Nongpoh, K’Lyngkot 17
Hadien ka jingud jingnam jong ki paidbah nongshong shnong kiba la mad jingeh namar ka jingpynslem ban pyndep ïa ka surok Pradhan Mantri Gram Sadak Yojana (PMGSY) kaba sdang na Nongbirthem sha Nongbirlum, ki nongïalam jong ka Federation of Khasi Jaiñtia & Garo People (FKJGP) North Khasi Hills ha ka Sngi Balang ki la leit ban jurip ïa katei ka surok ban lap ïa ki jingshisha kumba la ujor da ki paidbah nongshong shnong ka thaiñ.
Kum ban shu pyntip khyndiat, ïa katei ka surok na Nongbirthem sha Nongbirlum kaba jngai kumba 5 kilometer la mang tyngka lyngba ka skhim PMGSY ha ka jinglut kaba kot T.2.57 klur tam bad la sdang ban pyntrei naduh u Risaw 2019.
Ha ka jingleit jurip jong ki nongïalam ka seng ha ryngkat ka jingïadon lang ki nongïalam shnong ka Nongbirlum, la sakhi ba ka jingpyntrei ïa katei ka surok ka long kaba suki shaba palat. Kumba long haduh mynta, ïa katei ka surok la pyndep siang rong kumba shiteng eiei na katei ka 5 kilometer bad la sakhi ruh ba ka jingpyntrei ïa ka surok ka dang ïaid shakhmat wat haduh mynta mynne.
Kaei kaba la pynsngewkhia jur ïa ki nongïalam ka seng ha kane ka sngi, ka dei hadien ka jinglap ba ïa ka surok nalor ka jingsuki ban pyndep, la shu pyntrei torti da u kontraktor, ha kaba la ïohi ba wat ïa ka rong kaba la dep siang ruh, la lah ban shu khlong da ka kti namar ka jingstang palat jong ka jingsiang rong bad ki don ki jaka jong ka surok ba tang shu kyrshut tang da ki juti ruh ka la pra.
Haba kren sha ki lad pathai khubor, u Bah Luistar Lyngdoh, President ka FKJGP North Khasi Hills, u la pynpaw ïa ka jingsngewkhia jur halor kane ka jingpynslem ban pyndep ïa kane ka surok kaba ki paidbah ki la ud la nam na ka por sha ka por khamtam hadien ka jingsakhi markhmat halor ka jingpyntrei torti ïa katei ka surok namar ka jingstang palat ban siang rong khlem da bud ryntih ïa ki bynta katkum ba la bthah lyngba katei ka skhim jong ka sorkar kmie.
Kumba ka surok hi ka dei u budlum jong ka ïoh ka kot bad ka roi ka par, na ka liang utei u nongïalam seng, u la buh ka jingkyntu ba utei u kontraktor ba pyntrei ïa ka surok, u dei ban shimkhia bad ban pyndep sted ïa ka kam khamtam eh ba u dei ruh ban trei bha khnang ba kan long ka jingmyntoi ïa ki paidbah nongshong shnong ka thaiñ kiba ju pynmih ïa ki mar rep mar riang ban pynpoi sha ki ïew ki hat.
Ha kajuh ka por, u la kyntu ruh ïa ki bor ba dei khmih jong ka tnat PWD ba ki dei ban shimkhia ban pynthikna ba ka jingpyntrei ïa ka surok ka long katkum ka rukom kaba la buh da ka sorkar kmie ym ban shu trei tang dep rukom. U la pyntip ruh ba ha kine ki sngi ban wan, na ka liang ka seng kan sa leit kynduh bad ai ruh da ka jingthoh sha ki bor ba dei khmih ka tnat PWD halor katei ka surok bad kiwei surok kiba dang sahteng ha Ri Bhoi District.
