Nongpoh, K’Lyngkot 17
Ha kawei ka jingjia ïatyngkhuh kali ha surok bah National Highway 6 kaba hap ha Umsning Bypass ha ka Sngi Balang hapdeng ka trok kit maw Clinker bad ka trok kit jingbam syiar, u nongñiah trok u la mynsaw bad sahkut syndon hapoh ka trok.
Kane ka la jia ha ka por kumba 12.30 mynsngi hapdeng ka trok kit maw Clinker kaba don ïa u numbor AS01-JC-7251 bad ka trok kit jingbam syiar kaba don ïa u numbor AS01-NC-8892. La ong ba katei ka trok kaba kit ïa u maw Clinker, kaba dang hiar na Shillong sha Guwahati ka la pynher sted bha, ha kaba u nongñiah um shym la lah shuh ban teh lakam kat haduh ba katei ka trok kaba u ñiah, ka la thom ïa u divider ka surok bah bad leit ban tynrah beit ïa katei ka trok kit jingbam syiar kaba dang wan kiew na Guwahati sha Shillong.
Ha kane ka jingjia, u nongñiah ka trok kit maw Clinker u la mynsaw jur kat haduh ba u la sahkut syndon hapoh ka kali. La ïathuh ba dei tad haduh ka jingwan poi jong ka kali khwai sa lah ban sei noh ïa utei u nongñiah bad pynkit pat sha North Eastern Indira Gandhi Regional Institute of Health and Medical Science (NEIGRIHMS) ha nongbah Shillong na ka bynta ban pynïoh ïa ka jingsumar.
