Shillong, K’Lyngkot 17
Ha kawei ka jingjia, ki pulit ki la ïoh ïa ka jingujor na uwei u briew uba shong ba sah ha DGAR Laitkor, Shillong ba ha ka 10 tarik Kyllalyngkot ha ka por kumba 2:45 mynsngi, u la ïoh ïa kawei ka ‘phone call’ kaba u khlem ithuh bad ynda la ïakren, uta uba la ‘phone’ u la kyntu ïa u ban pyndonkam ïa kawei ka ‘Mobile App’ ba la tip kyrteng kum ka ‘Claim Reward’ na ka ‘Google Play Store’.
La ong ba ka jingphah pyndonkam ïa katei ka ‘App’ ka long ba un ïoh shim ïa kita ki jingai kyrpang (ICICI Credit Card Awards). Uta u nongujor ruh u la sngap ïa uta u briew bad u la leh kumba la bthah. Hynrei kham hadien, uta u nongujor u la lap pynban ba u la duh ei T. 2.5 lak na ka ‘Credit Card’ ICICI jong u.
Ki pulit ki la pyntip ba u Akshay Chandrakant Nimje u la ujor ba ha 24 tarik Nohprah, 2023, katba u dang leit na Shillong sha Shnongpdeng, West Jaiñtia Hills, u la lap ba ka ‘laptop’ jong u ka la jah na ka pla.
Ha kawei pat ka jingjia, u Maitshaphrang Michael Lyngdoh u la ujor sha ki pulit ba ha ka 10 tarik Kyllalyngkot, ki runar ki la tuh ïa ka ‘Sound System’ na ka kali Maruti Alto jong u kaba la pynïeng ha Oakland, Shillong.
Nalorkata, ki pulit ki la ïoh ïa ka jingujor na u Melamkmenlang Mukhim ba ha ka 13 tarik Kyllalyngkot ha ka por kumba 8 baje mynmiet, ki runar ki la leit rung sha ka ïing sah jong u ha Liamthaw, Smit bad ki tuh pisa T. 2 lak.
U Redison M Sangma, Headmaster & Secretary ka Rongsang Abagre School ha South West Garo Hills u la ujor ba ha ka 14 tarik Kyllalyngkot, ki runar ki la leit rung ha ka skul bad ki la tuh ïa 31 tylli ki ‘Battery’ kiba shongdor T. 7,04,000/- bad kiwei ki tiar.
