Tura, K’Lyngkot 17
Ha kawei na ki jingjia kaba pynpar ñiangkhriat ïa uba bun ba lang kaba la jia ha ka Sngi Balang ha ka shnong Babdam, West Garo Hills kaba jngai kumba 20 KM na ka nongbah Tura, kawei ka longkmie ka la shah khrai khlieh ha la u jong u khun hashwa ba un phet na la ïing.
Katkum ki khubor ba la ïohlum na ki pulit la ong ba kane ka jingjia ka la jia ha ka por mynstep ha kaba une u khun u la mait da ka wait ïa la ka kmie haduh ban da dkut ka khlieh kaba la pynlong ïa kane ka longkmie ban thiah lyngktar hapdeng ka jinglyngkien ka snam.
Ha kaba ïadei bad kane, mar ïa ïoh jingtip halor katei ka jingjia, ki para marjan ki la pyntip sha ki pulit ka West Garo Hills kiba la wan sha ka ïing sah jong katei ka longkmie.
U SP ka West Garo Hills u Abraham T Sangma u la ïathuh ba katkum ka jingbatai jong ki para shnong, utei u briew uba la leh ïa katei ka kam u dei uba don jingduna ha ka bor pyrkhat bad namarkata, la suba ba ka dei na kane ka daw ba u la pynïap ïa la ka jong ka kmie.
U la ong ba ka jingtohkit ha kaba ïadei bad kane ka jingjia ka dang ïaid shakhmat.
