Shillong, K’lyngkot 17
U Symbud Myntri Rangbah ka Jylla, Bah Prestone Tynsong u la ong ba kiba dawa ban buh biang ïa ki ophisar ka Meghalaya Lokayukta ki dei ban pule bha ïa ki kyndon kiba don ha ka Meghalaya Lokayukta Act.
Kane ka jingkren u Bah Prestone ka la wan hadien ba la mih ka jingdawa na ka Voice of the People Party ban buh biang ïa ki ophisar ka Meghalaya Lokayukta bad byrngem ban pynlong jingïakhih lada ym leh hapoh 24 kynta ïa ki ophisar kiba la dep weng.
U Bah Prestone u la ong ba ka Sorkar Jylla ka la dep pynshai haba ïadei bad kane bad kam long kaba dei ban shu dawa khlem da pule bha ïa ki kyndon jong kane ka aiñ namar ki kyndon ruh ki la kdew ba ki ophisar ka Lokayukta ki dei ban dei ki ophisar kiba dang trei ym kiba la shongthait na ka kam.
“Phi lah ban ong kumno-kumno tangba nga ïathuh ba na ka liang ka Sorkar hashwa ban leh kano-kano, ka la dep pyrkhat bha bunsien la ka dei ka jingthung briew hapoh ka Sorkar bad ka jingweng ïa kiba trei. Namarkata, ki mat ong katba kaba ki ong, hynrei ngi don ki kyndon bad ngi hap ban bud ïa kita,” la ong u Bah Prestone.
Ka Sorkar ruh ka la dep pynshai ba ki ophisar kiba la thung hapoh ka Lokayukta la weng namar ki dei kiba la shongthait na ka tnat pulit.
Kumta ha ka jaka jong ki, ka ophis Meghalaya Lokayukta ka la jied ïa ki ophisar IAS kiba kynthup ïa u Bah IW Ingty kum u Director Inquiry lem bad lai ngut ki ophisar MPS kiba kynthup ïa u Challang G Momin, John Clitzer A Sangma bad Baniateilang Diengngan.
Namar kata, ka Sorkar ka la ong ba ka rukom thung ïa ki ophisar ka dei kaba la leh katkum ka Meghalaya Lokayukta Act, 2014 hapoh ka kyndon 10 (2) kaba ong ba u Director of Inquiry bad Director of Prosecution ki dei ban dei ha ka kyrdan Additional Secretary jong ka Sorkar Jylla bad yn shah thung kum u Chairperson na ka thup jong ki kyrteng kiba la phah da ka Sorkar.
