Shillong, K’Lyngkot 17
Ka seng Hynñiewtrep Youths’ Council (HYC) ka la byrngem ban pynlong da ka jingïakhih lada na ka liang jong ka Meghalaya Public Service Commission (MPSC) kam lah ban pynbna noh mardor ïa ka risol jong ka post Typists (ordinary grade), kaba la ai jingpynbna naduh u snem 2016.
“Ngi la dawa na ka MPSC ba ka dei ban pynbna noh mardor ïa ka risol jong katei ka kam bad lada jia ba kam lah ban pynbna ne pynmih ïa ka risol, ka seng kam banse ban pynlong da ka jingïakhih,” la ong u President ka HYC u Bah Roykupar Synrem ha ka shithi ba la phah sha u Chairman ka MPSC ha ka Sngi Balang.
Lah ban pynkynmaw ba ka MPSC ka la khot aplikeshon ïa katei ka kam ha ka 26 tarik u Ïaïong 2016, bad ha ka 18 tarik u Naiwieng 2020, ka la pyntip ïa baroh kiba la aplai ba yn pynlong ïa ka screening test ha ka 10 tarik u Nohprah 2020 ha kylleng ki centre kiba don ha Shillong bad Tura.
Hadien kane, ka la pynbna ruh ïa ka risol jong ka Screening Test ha ka 21 tarik u Rymphang bad la pyntip ba ki samla kiba la shah jied kin ïakhun ïa ka Typing Speed Test bad ïa ka tarik yn sa pyntip hadien. Katba ha ka 8 tarik u Lber 2022 la pyntip ban pynlong ïa ka typing speed test ha ka 29 tarik bad 30 tarik u Lber 2022 ha Government Industrial Training Institute Rynjah, Shillong.
Katba ha ka 12 tarik u Ïaïong 2023 pat ka MPSC kala pynmih ïa ka jingpynbna ba ka risol na ka bynta katei ka kam la hap ban buhteng shwa namar ba ym shim la ïoh ïa ka Roster na ka sorkar bad hadien ba la ïoh pdiang ka Commission kan sa pynmih ïa ka jingpynbna.
U Bah Roykupar ha ka shithi ba la phah sha u Chairman ka MPSC, u la ong, “Ka seng ka dap da ka jinglyngngoh ba ka Commission haduh mynta kam lah shuh ban pynbna ïa ka risol na ka bynta katei ka kam, wat hadien ba ka la dap palat 7 snem naduh ba pynmih ïa ka jingpynbna paidbah, la palat ïa ka 3 snem naduh ka sngi ba pynlong ïa ka Screening Test, la jan dap 2 snem naduh ba la dep pynlong ïa ka Speed Test bad la jan dap shi snem naduh ba la pynmih ïa ka jingpynbna.”
“Ngi dawa na ka Commission ba ka dei ban shimkhia mardor ban pynbna noh ïa ka kyrteng jong ki samla kiba la pass na ka bynta ka Post Typists (Ordinary Grade) ha ki ophis jong ki tnat bapher bapher bad ban pyndep noh mardor ïa ki kam ki jam baroh jong ka jingthungkam hapoh ka por kaba biang,” la ong utei u nongïalam HYC.
