Jowai, K’Lyngkot:
Ka Synjuk Waheh Shnong Ri Jaiñtia ha ka kyrwoh ba ka phah ka pynpaw ka jingsngewkhia halor ka jingshah shoh jong ar ngut ki nongïalam shnong ka Tuber Kmaishnong ba kynthup ïa u Waheh Shnong bad Secretary IVCS uba long ruh u Chairman ka shnong Tuber.
Ka synjuk ka pynrem jur ïa u Bah Training Phawa uba shah kynnoh donkti ha kane ka kam da kaba shoh bad dat pynmynsaw da kaba mait da u sdie ïa kitei ki nongïalam shnong.
Wat lada don ka jingdom ruh, hynrei ka long pyrshah pat ïa uno-uno ban shim ïa ka aiñ ha ka kti bad pyrshang ban tur pyrshah da kaba pyndonkam da ki tiar pynma pynmynsaw.
Namar kata, ka synjuk ka pynrem jur ïa kane ka jingleh riewkhlaw jong u Training, bad ka kyrpad ïa ki bor jong ka aiñ ba dei peit bad pynneh ïa ka shongsuk shongsaiñ bad lada jia biang kumne ïa ki nongkitkam shnong dei ban pynshitom jur shisyndon ïa une u nongleh kam bymman da kaba tyngeh.
Nalorkata, ka synjuk ka kyntu ruh ïa ki Waheh Shnong bad nongshong shnong ka Ri lum Jaiñtia ban ïaieid markylliang, tylli, ban long kiba sngewthuh jingmut bad ban ïatreilang ha kino-kino ki kam khnang ban lait na ka jingshah ïuhroit ha ki briew shisngi bad ha ki mynder ri, la pynkut ka kyrwoh na u President ka Synjuk Waheh Shong Ri Jaiñtia.
