Shillong, K’Lyngkot 17
Hashwa ba kan leit phai na Meghalaya, ka President ka Ri, ka Droupadi Murmu, ha ka Sngi Balang ka la plie paidbah ïa ki motdur jong lai ngut ki khla wait ka jylla – U Tirot Singh, U Kiang Nangbah bad Pa Togan Sangma – ha ka ïing sah u Lat (Raj Bhavan) ha kane ka nongbah.
Ïa kine ki motdur la shna da ka Riti Academy of Visual Arts jong u Bah Raphael Warjri.
Ha kane ka jingplie ïa kitei ki motdur, la don lang u Lat, u Paghu Chauhan, u Myntri Rangbah, u Conrad K Sangma, ka Myntri Sorkar, ka Kong M Ampareen Lyngdoh bad kiwei ki heh sorkar.
Ka la don ka jingbatai ha ka President halor kitei ki lai ngut ki khla wait bad ka bynta kaba ki la leh pyrshah ïa ka sorkar phareng haduh ba kin da aiti ïa la ka jingim.
Nalorkata, ka President ka la thung ruh ïa uwei u tynrai dieng ha Raj Bhavan hashwa ba kan leit phai.
Lah ban kdew ba ka President ka la wan poi ha Tura ha ka 15 tarik Kyllalyngkot ban plie ïa ka lympung Meghalaya Games bad ha ka sngi kaba bud, ka la ïakynduh ïa ki dkhot ki Self-Help Group ha Balk bad ka la buh mawnongrim ban shna ïa ka Integrated Administration Complex.
Ka President ka la wan ruh sha Mawphlang bad ka la plie ïa ki projek surok bad buh mawnongrim ban tei ïa ka Shillong Peak Ropeway bad kiwei.
