Shillong, K’Lyngkot 17
Ka Joint Action Committee kaba kynthup ïa ka Federation of Riwar Mihngi Local Dorbar ha ryngkat ki kynhun bad ki seng bapher bapher jong ka thaiñ ha ka Sngi Balang ka la wan ban tur kynsan hakhmat ka shlem treikam jong ka National Highway & Infrastructure Development Corporation Limited (NHIDCL) Regional Office Shillong kaba don ha Barik, Shillong ha ryngkat ka jingrah ïa ki jingthoh ban pyrta pynrem ïa kane ka kompani bad ïa ka sorkar jylla ha kaba ïadei bad ka jingieh shrah ïa ka surok na Pynursla sha Dawki khlem da shna pynbha mynta la lai snem kynthih.
Hadien katto-katne por ka jingïakhih ryngkat ka jingthoh pynrem ïa ka NHIDCL, ki bor pynïaid ka kompani ki la khot ïa ki nongïalam ban ïakren. Na ka liang ki nongïalam ka JAC Riwar Mihngi ki la leit ban ïakynduh ïa u General Manager ka NHIDCL ban leit ïatai bad ban kylli na kaei ka daw ba katei ka surok haduh mynta kim lah ban shna pynbha.
Haba ai jingkren sha ki lad pathai khubor ha katei ka sngi hadien ba ki la wan ban ïakynduh, ki nongïalam ka JAC ki la ïathuh ba halor kane ka surok kin ai por hapoh 20 sngi ïa katei ka kompani bad ïa ka sorkar ba kan sdang pynbha ïa katei ka surok. Lada kim leh kumta, ka JAC kan hap ban kiew noh shaduh sha ka Meghalaya High Court ban ujor syndon da ka Public Interest Litigation (PIL) halor kane.
“Ka jingwan jong ngi ban rah ‘placard’ da kaba jai-jai ka long kum ka dak ka shin ban pynpaw sha ka sorkar jylla bad sha kane ka kompani namar ka jingtrei ïa katei ka surok Shillong-Dawki khamtam eh na Pynursla sharum ter ter shaduh sha Umsyiem ka la long kaba ym ïahap shuh ban peit ba ka dei ka surok”, la ong kitei ki nongïalam ka JAC.
Ki la ïathuh ruh ba kane ka jingieh ïa kane ka surok khlem da shna ka la don mynta kumba lai snem kynthih bad ki la mad shibun ki jingeh ha ka leit ka wan. Haba ki leit ban ïakynduh ïa ka sorkar ne ïa katei ka kompani, ka la shu sahkut tang hapdeng ki jingkular na ka por sha ka por hynrei ka kam pat ka khlem poi shaei-shaei ruh.
“Na ka liang jong ngi kum ka synjuk, ngi ïohi ïa ka jinglong bym suitñiew jong kane ka ophis NHIDCL ryngkat bad ki kontraktor jong ki la buh na ka snem sha ka snem, mynta ym duna bad la palat ïa ka lai snem la dep ban pynjot ïa ka surok na Shillong shaduh Dawki”, la kubur ki nongïalam. Kitei ki nongïalam ki la ong ruh ba ka dor jong ka bai shong kali ban ïaid lyngba katei ka thaiñ ka la long shaba palat. Ka daw jong kane ka dei namar ka jingsniew eh jong katei ka surok kaba la pynlong ruh ïa ki kali ba kin thud bad sniew.
”Ïa katei ka surok naduh na Pynursla shaduh sha Dawki Tamabil, la ïohi ïa ka jinglong bym kheiñkor bad la ïohi ba la ïuhroit ruh da u nongmihkhmat ka thaiñ uba dei u Symbud Myntri Rangbah jong ngi bad ha kajuh ka por uba dei peit ruh ïa kane ka surok”, la ong kitei ki nongïalam.
Kitei ki nongïalam ki la phah ruh ïa ka kyrwoh sha ka tnad PWD bad sha u Myntri ba dei khmih halor katei ka bynta ba un shimkhia lem namar katei ka surok ka long u budlum ka jingïoh jingkot hynrei namar ka jingsniew ka surok ka la wanrah ka jingduhnong kaba shaba palat bad ka ïoh ka kot ka hiar.
Shuh shuh ka JAC ka la dawa ruh ba kum u nongmihkhmat ka thaiñ Pynursla Constituency bad uba dei ruh u Symbud Myntri Rangbah ka jylla uba dei peit ïa ka tnad PWD (Roads), u Bah Prestone Tynsong ba lada kum u nongmihkhmat ka thaiñ um don ka jingkitkhlieh na ka bynta ka dong ka thaiñ bad lada um lah ban tuklar ban sdang noh ïa ka jingshna ïa ka surok na Shillong sha Dawki bad khamtam ïa ka surok naduh Pynursla kaba la jot rathai, ka la bha ba un hiar shuki noh.
“Lada u nongmihkhmat jong ngi bad uba dei ruh u Symbud Myntri Rangbah ka jylla bad ha kajuh ka por uba peit ïa ka surok, lada u don shisha ka mynsiem ka jingkitkhia ïa la ka jong ka dong bad ka thaiñ, nga dei ban ong ba u dei ban hiar shuki noh lada ym lah ban pyndep ïa kane ka surok ha kine ki bnai bad ki taïew ki ban wan”, la kren tyngeh kitei ki nongïalam.
