Shillong, K’Lyngkot 17
Ka Wah Kynshi kaba pawnam bha bad kaba don ïa ka jingitynnad kaba pynshohbiej ïa ki paidbah mynta ka la kylla long pynban ka wah kaba jaboh bad kaba don jingma ïa ka koit ka khiah ban pyndonkam ïa ka.
Haba kren sha ki lad pathai khubor ha ka Sngi Balang ha Shillong Press Club, ka Khasi Student’s Union (KSU) Ranikor Circle, u President ka seng, samla M. Thongni, u la pynpaw ka jingsngewkhia halor ka jingjaboh jong katei ka Wah Kynshi ha kaba katei ka wah ka la kylla rong jyrngam.
Ka seng ka la ong ba na ka liang jong ka KSU Ranikor Circle ka la ïai ban lah slem na ka por sha ka por ba ka sorkar ka dei ban leh ‘test’ ïa katei ka wah ban tip ba haduh katno katei ka Wah Kynshi ka long bih. Hynrei haduh mynta-mynne la ïohi ba na ka liang jong ka sorkar ka la shu phah tang ïa ka Meghalaya Pollution Control Board.
“Kat haduh mynta, ngi ïohi ba ki kaiphod jong ka Meghalaya Pollution Control Board ka shu kut tang kumto ban ‘test’ bad ngi khlem ïohi ba kan pynbna paidbah ba ka long shngaiñ ne em na ka bynta ki paidbah ba kin pyndonkam biang ïa katei ka Wah Kynshi”, la ong u Bah Thongni. U Bah Thongni u la ong ruh ba ka jingkynrei ka jingpang bampong hapoh Ranikor ka la long kaba ktah haduh katta katta khamtam ïa kiba hapoh ka 29 snem ka rta bad lehse, katei ka jingkynrei ka jingpang bampong ka dei na ka daw katei ka wah.
U la ong na ka liang haba ïohi ïa ka jingkynrei jong ka jingpang bampong hapoh ka shnong, ka la pyrshang ban lum jingtip hapoh kitei ki thaiñ. Na ka liang ka seng ka la lap ba kiba bun kiba pang bampong hapoh katei ka thaiñ ki la khlad noh.
“Ka long kaei-kaei kaba sngew kyndit ban ïohi biang ba ka la mih biang ka jingthmu ban pynlong tamasa hangto hapoh ka wah bad ka long kaba sngewkhia na ka bynta kiwei pat ki briew kiba na kiwei ki distrik ki bym tip ïa kaei kaei”, la ong u Bah Thongni.
Na ka liang ka seng ka la kyntu ïa ki paidbah kiba thmu ban wan sha ka tamasa ba kin kiar na ka ban sum ban sait lane ban dih ïa ka um na katei ka wah namar ba kam long kaba shngaiñ. Ka seng ka la kyntu ïa ka sorkar ba kan leh ‘test’ noh mardor ban lap bad tip haduh katno ka jingshong bih jong katei ka wah ka long bad ban pynkhuid noh ruh ïa katei ka wah.
Na ka liang ka seng ka la ong ba ka kwah ban ïohi biang ïa ka jingkhuid-jingsuba jong katei ka wah kumba ka ju long ha ki por bad ki snem kiba lah dep. Kum ka seng ka khlem wan satia shakhmat ban pyrshah ïa katei ka tamasa kaba ki thmu ban pynlong hajan katei ka wah ha ki sngi ban sa wan hynrei ka seng ka pynpaw halor ka jinglong jingman jong katei ka wah.
Ka seng ka la ong ruh wat haba la khang ïa ka jingtih dewïong ruh hynrei katei ka wah ka dang ïai long sah kumjuh bad kum ka seng kam tip satia la ka jingtih dewïong ka dang don ne em ha ki bynta kibar marjan bad na ka daw aiu ba la pynlong ïa ka wah ba kan jaboh kumtei.
Ka seng ka la kyrpad ruh ïa ka sorkar jylla ba kan shna pynbha noh ïa ka surok kaba pynïasoh naduh ka shnong Mawsynram shaduh sha ka shnong Laitumsaw kaba la sniew shaba palat. U la ong ba lada ka sorkar ka bun pisa ban pynlut phut ha ki tamasa hynrei ka dei ruh ban theh pisa bad phaikhmat ruh lem sha katei ka dong bad ka thaiñ ban shna pynbha ïa katei ka surok kaba hap hapoh ka tnad PWD ka Mawsynram Division kaba ka la buh jingeh shikatdei eh ïa ki paidbah nongleit-nongwan.
“Ngi kyrpad ïa ka sorkar ba lada ka bun pisa haduh katta katta ban pynlut na ka bynta ki tamasa, ka dei ban pynbha lem ïa ki surok jong ngi ha katei ka dong bad ka thaiñ jong ngi khnang ba ki paidbah kin nym mad ïa kane ka jingeh ha ka ïaid ka ïeng haduh mynta”, la ong u Bah Thongni.
Ka seng ka la kyntu ruh ïa ki bor distrik ba kin ïatreilang bad ki dorbar shnong bad ban pan jingbit shwa na ka dorbar shnong hashwa ban pynlong ïa kano-kano ka tamasa.
