Jowai, K’Lyngkot 18
Ka aïom lehkmen ki hep barit ne ka lympung ki khynnah seng Khasi Seiñraij kaba Khatphra (18) ka ban long ha ka 20 bad 21 tarik Kyllalyngkot ha ka shnong Nongkynrih, West Jaiñtia Hills District, la sakhi ba ka jingpynkhreh ka la ïaid shaid shaid.
Ïa kane ka lympung ki khynnah la pynlong da ka Seiñraij Nongkynrih, Laskeiñ Pyllun, West Jaiñtia Hills District ha madan Seij Kynden Nongkynrih Laskeiñ Pyllun halor ka phang pdeng “Ha la thymmei ngin tei ïa ka lawei”.
Ka jingjngai na Shillong ka long 90 kilomitre bad ka lynti ïaid ka dei na Jowai, Phramer, Shangpung bad Raliang.
U Dolloi ka Elaka Jowai Bah Puramon Kynjing uba dei ruh u President ka lympung ki Khynnah Seng Khasi Seiñraij haba kren sha ki lad pathai khubor u la ong, ka jingthmu jong kane ka lympung ka long ban pynkmen pynsngewbha ïa ki khynnah bad ruh ban pynshlur ïa ki ban pynpaw pyrthei ïa ka sap rwai sap shad ba ki don.
U la ong kane ka aïom lehkmen ki khynnah ka la sdang naduh ka 12 tarik Nohprah 2023 bad kan kut ha ka 21 tarik Kyllalyngkot 2024 da ka jingwan ïashim bynta ki 22 tylli ki tnat Jylli jong ka Lympung ki Khynnah Seng Khasi Seiñraij ba don hapoh ka Bri u Hynñiewtrep Hynñiewskum.
U la ïathuh ba ha ka sngi pynkut kan don ka jingpynkup burom bad sam khusnam sha baroh ki khynnah kiba ïashim bynta ha ki jingïakop bapher bapher kum ka jingpyni riam tynrai, ki jingïalehkai tynrai kum ka dat mawpoiñ, ka siat khnam bad kiwei kiwei ki jait jingïakop.
Ha kaba ïadei bad ka lynti syngkien, u Dolloi u la kyrpad ïa baroh ki nongwan sha ka lympung ban ym ïaknieh ïaid shwa namar ka surok kaba khlad na Raliang ban poi sha ka shnong Nongkynrih ka dei ka surok kaba khim ha kaba ki kali ki hap ban ïaid da kaba bud da u laiñ khnang ba ki nongwan sha ka lympung kin lait ban duh bhah duh bynta lang.
U la kyrpad ruh ïa kito kiba shim bynta ha ka lympung ban wan sahmiet lypa, khnang ban lait na kano kano ka jingdheng ne slem sha ka lympung bad la kyrpad ruh ïa baroh ban ym bret pathar ïa ki plastik ne ki song jingbam kiba pynjakhlia ïa ki lynti syngkien.
U Waheh Shnong Nongkynrih u Bah Kamailang Tyngkan uba dei ruh u President Seiñraij Nongkynrih Laskeiñ Pyllun, u la pynpaw ka jingkmen ïa ka jinglah ban pynlong ïa ka lympung ki khynnah hapoh ka shnong Nongkynrih. U khmih lynti ruh ba baroh ki nongwan sha ka lympung kin poi da ka jingsuk jingsaiñ khnang ba kane ka lympung ki khynnah kan long kaba iphuh-iphieng bad shong kun shong khia.
Ha kaba ïadei bad rukom pynïeng kali, u la ong namar ba ka dei ka surok kaba khim, kumta la kyrpad ïa baroh ki nongwan na ka thaiñ Raliang ban pynïeng kali hapoh ka madan phutbol Madankynsaw bad ha madan ba la pynkhreh hapoh ka shnong Nongkynrih, bad ïa kiba wan na ka thaiñ Shilliang Myntang kum ka Saphai, Sahsniang, Mukroh, Saba la pynkhreh ïa ka jaka pynïeng kali ha Umpung kaba don sharum ka shnong Nongkynrih.
