Shillong, K’Lyngkot 18
Ki nongshong shnong jong kawei ka shnong ha North Garo Hills ki la lap ïa ka met kaba sah jong uwei u nongñiah kali ha ka 15 tarik Kyllalyngkot. Ka jinglap ïa kane ka met ka long lai sngi hadien ba san ngut ki briew ki la shim wai ïa ka kali kaba u ñiah ban leit na Shallang, West Khasi Hills, sha Dudhnoi, Assam.
Katkum ka khubor na ki pulit, u Anthony G Momin u la ujor ba ha ka 13 tarik Kyllalyngkot, san ngut ki briew ki bym lah ban ithuh ki la shim wai ïa ka kali jong u kaba don ïa u nombor AS-01EQ-7779 ba la ñiah da u Udoy M Sangma. Kine ki san ngut ki la shim wai ïa ka kali ban leit na Shallang sha Dudhnoi, Assam. U Anthony u dei ruh shi kynum bad u Udoy. La ong ruh ba kine ki san ngut ki dei ki Garo, hynrei ym lah satia ban ithuh ïa ki.
Hynrei u Anthony u la ujor ba ha ka 15 tarik Kyllalyngkot ha ka por kumba 7:30 mynstep, ki nongshong shnong ka Upper Rongbu Mendima kaba don ha North Garo Hills ki la lap ïa ka met kaba sah jong u Udoy najan kane ka shnong.
Shuh shuh la ong ruh ba kitei ki san ngut ki la mynjur ban siew T. 4,000 na ka bynta ka bai kali ban leit na Shallang sha Dudhnoi.
Ha ka 13 tarik Kyllalyngkot, u Anthony u la ong ba u Udoy u la phah ïa ka jaka kaba u don sha la ka kurim lyngba ka ‘Mobile Phone’, hynrei hadien kata, ka ‘Mobile Phone’ ka la lip noh khlem tip na kaei ka daw.
Nalorkata, u Anthony u la ong ba ka jaka ba la lap ïa ka met jong u Udoy ka dei ruh kaba don marjan bad ka jaka kaba u la phah sha la ka kurim lyngba ka ‘Mobile Phone’. Hynrei la ong ruh ba ka kali bad ka ‘Mobile Phone’ ki la jah rngai bad la suba ba kitei ki briew ki la rah lang noh bad ki.
Ha kaba ïadei bad kane, ka seng A’chik Holistic Awakening Movement (AHAM), Rongjeng Unit ka la pynrem jur halor ka jingshah pynïap jong u Udoy. Ka la kyntu ruh ïa ka sorkar jylla ba kan ai jingïarap ïa ka longïing longsem jong u Udoy kaba la mad ïa ka jingduh kaba khraw.
