Nongstoiñ, K’Lyngkot 18
Ka jingkut jingmut bad ka jingtrei shitom la ha kano-kano ka kam, la ka long ha ka kam bylla, ka rep ka riang khlem da phai dien ïa kiba bun ki jingeh ba ïakynduh, shisha ka wanrah ïa u soh ka jingjop bad kane ka long ruh lehse ka nuksa ha ka imlang ka sahlang.
U Bah Spingwell Kharmawshra na ka shnong Mawduh ha West Khasi Hills, u dei uwei na ki ‘riew rangbah uba la ïoh ïa bun tylli ki khusnam namar ka jingtrei shitom jong u kum u nongrep.
U Bah Spingwell u la ong ba u la iehnoh ïa ka kam sorkar kaba u ju trei ha ka skul Mawduh Def Upper Primary School hadien ba u la shim ïa ka rai ban shu rep.
Une u rangbah u la ïathuh ruh ba u don 7 ngut ki khun ryngkat ka kurim bad u la seng ruh ïa ka karkhana shna umsoh bad waiñ kaba la tip ruh kum ka M/s Mawduh Ïongï IVCS (Integrated Village Co operative Society). Nalor kane u don sa 4 tylli ki shnat treikam kiba hap hapoh ka jingkhmih jong u, kum ha ka shnong Pyndenglawar, Nongjyllieh bad Mawduh.
“Nga im ban rep, ym ba nga rep ban im,” kine ki long ki kyntien kaba u Bah Spingwell u la pynpaw kum ka jingai mynsiem lem ïa kiwei ki para nongrep.
Shuh shuh une u rangbah u la ïathuh ruh ba tang namar ka kam rep ka jong u, u la dei uwei na kiba la ïoh ïa ka khusnam kaba heh bha kum u nongrep ïa kaba la tip ruh kum ka District Millionaire Farmer of India Award 2023 kaba la pynlong ha IARI, PUSA, New Delhi dang ha u Naiwieng 2023, bad la ong ba ïa katei ka khusnam na West Khasi Hills district la ïoh tang ma u marwei.
