Nongpoh, K’Lyngkot 18
Kawei na ki longkmie kaba la don ïa ka bynta kaba khraw ban shakri ha ka imlang ka sahlang bad ki paidbah ka thaiñ Ri Bhoi, ka Kong Jennyfer Joan Kylla ka la khlad kyndit noh ha ka Sngi Palei hadien ka jingban jong ka jingshitom kaba la neh kumba katto-katne por.
Kum ban shu ïathuh khyndiat, ka Kong Jennyfer Joan Kylla ba ju tip ruh kum ka Kong JJ Kylla, ka dei kaba shong ba sah ha Umsning, Ri Bhoi District bad ka dei ruh kaba la noh synñiang ha kiba bun ki liang jong ka kam shakri paidbah. Katei ka longkmie, ka dei ruh kaba la trei kum ka Headmistress jong ka Nehru Memorial Secondary School bad ka Headmistress jong ka Eden Academy Secondary School.
Nalor kitei ki kam hikai skul, katei ka longkmie ka dei ruh kaba long teng kum ka dkhot jong ka Meghalaya State Women Commission, ka Chairperson jong ka Child Welfare Committee ka Ri Bhoi bad kaba seng ruh ïa ka Women Organisation of Ri-Bhoi District (WORD) bad kiwei kiwei de ki kam ban kyntiew ïa ki longkmie bad ki paidbah ka thaiñ Ri Bhoi hi baroh kawei.
Ïa ka met kaba sah jong ka Kong Jennyfer Joan Kylla yn pyndonburom bad lehniam khatduh ha ka 20 tarik mynta u bnai ha ïingsah jong i, ka ban pynbud pat da ka jingleit ontep sha u lum jingtep ka Balang U Blei, Umsning ha ka por nohphai sngi.
