Shillong, K’Lyngkot 18
U Myntri ka tnat Korbar Ri ka Sorkar Kmie u Amit Shah ha ka jingïakynduh ïa ki nongïalam ka Bharatiya Janata Party (BJP) na Meghalaya, u la kohnguh ban sa bishar bniah halor ki mat ba donkam jong ka jylla.
Ki nongïalam ka BJP Meghalaya hapoh ka jingïalam jong u State President u Rikman Momin bad u Myntri ka Sorkar Jylla u Bah A.L Hek ki la leit ban ïakynduh ïa u Amit Shah uba la wan poi ha nongbah Shillong.
Ha kane jingïakynduh, ki nongïalam ka BJP ki la ïoh ban ïakren halor ki mat ba donkam jong ka jylla kum ka jingithuh noh ïa ka ktien Khasi bad Garo ha ka Khyrnit ba Phra, ka mat ILP bad ka jingplie ïa ka lynti ïaid sha ka ïew ïadie ïathied jong ka thaiñ Shatei Lam-Mihngi lyngba ka jylla Meghalaya ïa kaba u Amit Shah u la sngap thuh bad u la kohnguh ban bishar bniah halor kitei ki mat.
Ha kajuh ka por na ka liang u Amit Shah u la khot sngewbha ruh ïa ki nongïalam niam jong ka jylla sha nongbah Delhi hapoh ka jingïalam u State President bad u Bah A.L Hek ban ïakren halor ki jingdonkam ha kaba ïadei bad ka FCRA bad ruh ïa ka jingai jaka ha nongbah Delhi sha ka KJP Synod.
