Shillong, K’lyngkot 18
U Myntri ka tnat Korbar Ri ka Sorkar Pdeng, u Amit Shah u la poi ha nongbah Shillong bad un pynïaid ïa ka jingïalang kaba 71 jong ka North Eastern Council (NEC) ha Shillong nalor ka jingïalang jong ka NESAC Society ha ka Sngi Thohdieng.
Katkum ka jingpynbeit ïa ka por ba un ïashimbynta ha Shillong ha ka Sngi Thohdieng, la ong ba u Amit Shah un pynïaid ïa ka Plenary Session jong ka NEC ha State Convention Centre ha Shillong ka ban sdang ha ka por 10 baje mynstep. Hadien kane yn bud sa ka jingïalang jong ka NESAC Society ha kane hi kajuh ka jaka ha ka por 1.30 baje nohphai sngi.
Ki Lat bad ki Myntri Rangbah nalor ki Chief Secretary jong baroh 8 tylli ki Jylla ka thaiñ Shatei Lam Mihngi kin ïashimbynta ha ka Plenary Session kaba 71 jong ka NEC ha Shillong.
Ka la don ruh ka jingïalang phylliew jingmut kaba la pynïaid da u Secretary ka tnat DoNER u Chanchal Kumar ha Convention Centre, Shillong ha kaba la donlang ki Chief Secretary na ki Jylla bapher bapher bad ki Planning Secretary nalor nongmihkhmat ka NITI Aayog bad ki Secretary jong ki tnat treikam bapher bapher ka Sorkar Pdeng.
Na ka liang u Chanchal Kumar u la batai shaphang ki kam kiba ka tnat DONER bad ka NEC ki la leh na ka bynta ki Jylla ha ka thaiñ Shatei Lam Mihngi bad u kyntu ïa baroh ki dkhot ban pynsngew ïa ki jingeh ha la ki jong ki Jylla naduh ki prokram bad ki mat treikam kiba ïadei bad ka DONER.
U Secretary ka NEC u la ai ka jingbatai halor ka Industry 4.0 bad baroh ki Chief Secretary na ki Jylla bapher bapher ki la ai ka jingbatai haba ïadei bad ki projek ka NEC kiba dang pyntrei ha ki Jylla ha kane ka thaiñ, ha kaba la donlang ki ophisar ka tnat DONER, NEC bad na ki ophisar na ki Sorkar Jylla ha ka thaiñ Shatei Lam Mihngi.
Ynda la dep na Shillong ha ka Sngi Thohdieng, u Amit Shah un leit sha Assam ha kaba un donbynta ha bun tylli ki prokram ha ka Sngi Saitjaiñ naduh ka jingshimbynta ha ka jingdap 60 snem ka jingsdang ïa ka Sashastra Seema Bal (SSB) ha SSB Complex, Tezpur, ka passing out parade ki 2,551 ngut ki Assam Police Commandos ha Sarusajai Stadium, Guwahati nalor ka jingplie ïa ka Brahmaputra Riverfront ha Guwahati ha ka por 6 baje janmiet.
