Shillong, K’lyngkot 18
U MDC ka Sohra uba dei ruh mynta u nongïalam ka liang pyrshah ha KHADC u Bah Titos Chyne, u la ong ba ym tang ki MDC kiba sah ha umdum hynrei ki paidbah kiba dei ki nongjied ïa ki nongmihkhmat ki la sah umdum namar ka sorkar jylla ka khlem kren shai la kan pynlong ne kan nym pynlong ïa ka ilekshon MDC.
U Bah Titos Chyne u la ong ba kum ki nongmihkhmat ki ju shah kylli ha ki paidbah haba ki leit sha ki jaka khawai ne ki jingïalang ïa ka ilekshon MDC hynrei ma u ruh um nang ban jubab namar ïa ka ilekshon MDC la pynïaid da ka sorkar jylla.
U la ong ba ha kine ki sngi u Deputy Chief Minister, u Bah Prestone, u la ong ba ka dang ïaid ka jingpynbeit ryntih ïa ki konstitwensi da ka Delimitation Committee hynrei u khlem kren shai lano kane ka committee kan pyndep ïa la ka jong ka kamram.
“Ha ka jingshisha ka sorkar jylla ka la dei ban pynbna ïa ka tarik ilekshon namar ka samoi treikam ki MDC ka la kut hapoh san snem hynrei ka jingsngap jar-jar jong ka sorkar i kumba kam kwah ban pynlong ïa ka ilekshon” u la ong.
Nalor kata, u la ïathuh ba ka UDP ka la pynkhreh shaid shaid ban ïakhun ïa ka ilekshon MDC namar ïa kito ki konstitwensi ba la don lypa ki MDC ki la thikna ban ïoh tiket bad ïa ki konstitwensi ba don ki MLA hangto ruh la aiti ha ki ban shim rai.
Kum ban shu pynkynmaw ba ka samoi treikam ki MDC ka KHADC bad JHADC ka la dei ban kut noh ha u Lber 2024 bad ïa ka ilekshon ka sorkar jylla ka la dei ban pynbna noh lashem taïew jong u Kyllalyngkot ban pynlong ïa ka ilekshon ban jied thymmai ïa ki MDC hynrei haduh mynta ym don dak eiei.
