Shillong, K’Lyngkot 18
U Myntri Rangbahduh ka Ri, u Narendra Modi, u la ïakren bad ki nongïoh jingmyntoi jong ka Viksit Bharat Sankalp Yatra ha ka Sngi Palei lyngba ki kor ki bor na Delhi, bad da ki hajar ngut ki paidbah ki la ïasnoh kti.
Na Ri Bhoi distrik jong ka jylla Meghalaya, ka samla Silme Marak ka la ïoh ban ïakren bad u Modi ha ka jingdonlang ki Myntri Sorkar Pdeng, MP, MLA bad kiwei.
Ka jingim jong ka samla Silme Marak na Ri Bhoi ka la kylla hadien ba ka la phaikhmat na i dukan barit sha ka kynhun ‘Self-Help Group’. Mynta kane ka samla ka ïarap ïa ki longkmie ha ka thaiñ ban pynrung kyrteng ha ki ‘Self-Help Group’, bad ka la ïarap ruh ha ka ban thaw sa palat 50 tylli ki Self Help Group. Ka Silme ka dei ka nongïoh jingmyntoi na ka skhim PM Kisan Samman Nidhi, Bima bad kiwei kiwei ki skhim Sorkar Pdeng.
Kane ka samla ka pynïaid ruh ïa ka ‘Customer Service Point’ ha ka Block jong ka bad ïarap ïa ki briew ban ïoh ïa ki skhim jong ka sorkar. Ka kynhun jong ka, ka trei ha ki kam kiba ïadei bad ki marbam.
Haba ïaroh ïa ka jingskhem jingmut jong ka Silme, u Myntri Rangbahduh u la kdew kyrpang ïa ka jingshemphang jong ka ha kaba ïadei bad ki skhim sorkar bad ka jingtbit jong ka ïa ka ktien Hindi
“Phewse phi kham tbit ban ïa nga,” la ong u Modi haba ïaroh ïa ka Silme. U la ïaroh ruh ïa ki kam noh synñiang jong ka sha ka imlang sahlang bad, “ka jingaiti jong ki briew kum ma phi ka dei ka bor ha lyndet ka jingkut jingmut jong ngi ban pynpoi ïa ki jingmyntoi jong ka skhim sorkar sha baroh ki nongshong shnong jong ka ri. Ki briew kum ma phi ki pynsuk ïa ka kam jong nga. Phi long Modi jong ka shnong jong phi.”
