Shillong, K’Lyngkot 18
U Myntri Korbar Ri bad Cooperation, u Amit Shah, ha ka Sngi Palei u la plie ïa ka shlem ba la ai kyrteng ‘Cyber Security Operations Centre’ ha ka shlem treikam jong ki shipai Assam Rifles ha Laitkor.
Katkum u kyrwoh khubor na ka sorkar, la ong ba kane ka shlem kan pynkhlaiñ ïa ka jingshngaiñ lane ‘Cyber Security’ da kaba peitngor, pynduna ïa ki jingma bad jingïada ïa ka jingïoh pyndonkam bakla ïa ka ‘Assam Rifles Wide Area Network (ARWAN)’.
Haba kren ha ka jingïalang, u Amit Shah u la ong ba hapoh ka jingïalam jong u Myntri Rangbahduh ka Ri, u Narendra Modi, ka Ri ka la shim ïa kiba bun ki sienjam ban pynkhlaiñ ïa ka jingpyndonkam ïa ki kor ki bor.
U la ong ba ka sorkar jong u Modi ka long kaba kloi ban leh ïa ki kam ban pynlong shngaiñ ïa ka jingpyndonkam ïa ka ‘Internet’ na ka bynta baroh. Ha kajuh ka por, u la ong ba ka sorkar ka shimkhia ban ïada na ka jingmih ki kam be-aiñ lyngba ka ‘Internet’ lane kita ki ‘Cyber Crime’.
U Myntri Korbar Ri u la ïaroh ruh ïa ka Assam Rifles kaba la shim ïa ki sienjam ban pynthymmai ïa ka rukom treikam, u la ong ba katei ka shlem (Cyber Security Operations Centre) ka don ïa ki kor ki bor kiba katkum kane ka juk bad ka lah ban ai jingshakri na ka bynta 24 kynta.
Lah ban kdew ba katei ka shlem ka dei ka banyngkong tam ban don ha kano-kano ka kynhun jong ki pulit Sorkar Pdeng lane Central Armed Police Force (CAPF).
Hynrei namar ka jingbun ki kam be-aiñ ba la leh lyngba ka ‘Internet’, ka la long kaba donkam ban ïada ïa ki kor ki bor na ki briew kiba don jingthmu ki basniew.
