Khliehriat, K’Lyngkot:
Ban pynsah jingkynmaw ïa u riewkhraw jong ka Raij Tuber bad uba dei ruh u khlawait jong ka Rilum Jaiñtia, ka Seiñraij Tuber ka la tei da u mot dur (Statue) jong u Woh Tep Kyndait ha Tuber Kmai shnong.
Ïa une u mot dur sahnam la wan ban plie pyrda ha ka 17 tarik Kyllalyngkot da u symbud Myntri Rangbah ka Jylla u Bah Sniawbhalang Dhar ha ka jingdonlang u Myntri ka sorkar Jylla u Bah Kyrmen Shylla uba dei ruh u MLA ka thaiñ, u MLA ka Jowai Wailadmiki Shylla, ki MDC, ki riew rangbah ka Raij nalor kiwei kiwei.
Ïa ka jingïalang la pynïaid da u Bah Harvis Phawa President Seiñraij Tuber bad la ïoh ka nguh blei nguhsyiem na u Shanly Rymbai u Langdoh ka Raij Tuber bad ki kyntien pdiang burom na u Jolby Sana, u General Secretary, Seiñraij Tuber.
U Bah Sniawbhalang Dhar ha ka jingkren u la ong, donkam ka jingïatreilang ki ‘riew rangbah bad u la ïaroh ïa ka Raij Tuber ba ha ki phew snem kiba la leit la sakhi ba ha ka Behdieñkhlam la riam da ki sut, ki ryndia, ki muka kiba dei ki riam kiba shongkhia bha.
U la ong ha kane ka juk kaba mynta donkam ban don ruh ïa ka akor ka burom wat lada um lah ban kynjoh 100 persen hynrei dei ban pyrshang ban poi sha kata.
U la kular ruh ban ïatreilang ryngkat bad u MLA ka thaiñ ban wanrah ïa ka surok ka ban leit sha Khloo Blai ban pynsuk ïa ki nongleit nongwan sha kane ka jaka.
Ïa ka khana lyngkot shaphang u Woh Tep Kyndait la ïathuh da u Bah Helping Phawa uba dei u nongaibuit ka Seiñraij Tuber.
Ha kane ka sngi la ïoh ka jingkren na u Bah Kyrmen Shylla, Wailadmiki Shylla, Leiky Sayoo, General Secretary Seiñ Kyntu Seiñ Raij 12-Dolloi, Puramon Kynjing Dolloi Elaka Jowai bad na u Tellme True Phawa, General Secretary Shnong Tuber.
