Jowai, K’Lyngkot:
Ka shlem treikam Deputy Commissioner kumjuh ki tnat treikam sorkar ba kynthup ka Executive Engineer PWD (Rds) Jowai Central Division Jowai, Executive Engineer Water Resource Jowai Division, West Jaiñtia Hills ryngkat ki dkhot bad nongïalam ka Seiñ Khooid Ya ka Wah Myntdu, ka Jaiñtia Fishing and Environ-ment Protection Associa -tion ha ka 17 tarik Kyllalyngkot ki la pynlong ka jingleit jurip ïa ka Wah Myntdu.
Ïa kane ka jingleit jurip la lamkhmat da u Bah S. Phanbuh, MCS, Assistant Commissioner, Revenue West Jaiñtia Hills ryngkat ki babu sorkar ha ka jingdonlang u Bah Khroo L Pariat, President, D.H.Pde, President Jaiñtia Fishing and Environment Protection Association and bad kiwei kiwei.
Ka jingjurip ka sdang na Liar Pam Kam kaba la jan duh jan dam na ka daw ka jingpyndap khyndew na ka jingshna surok, na Jingkieng Myntdu ha Tre-Iongriang bad pynkut pat ha Oor-Khla.
Ka jingjurip ïa ka Wah Myntdu kadei hadien ka jingud jingnam jong ki paidbah nongshong shnong bad nongrep halor ka jingbym shngaiñ shuh ka jingïoh ïa ka umbam umdih namar ka jingbym lah shuh ban khlong ïa u shyiap ba la dap ha kiba bun ki bynta ka Wah Myntdu bad ruh ka jingïohlad ki briew ban bret pathar ïa ki ñiut ki jakhlia bad ruh ka jingtheh khyndew ha shilynter ki bynta ka Wah Myntdu khamtam ha ki bynta ba dang shna ïa ka surok thymmai kaba don ha Treiong-riang.
Ki dkhot ka Khooid ya ka Wah Myntdu bad dkhot ka Jaiñtia Fishing and Environment Protection Association ha ka jingjurip ïa ki bynta ka Tre-iongriang ki lap ba ka rukom pyntuid khyndew na ka jingshna ïa ka surok thymmai ka long kaba khlem da pyrkhat bad ym dei tang ba ka buh jingma hynrei ka lah ruh ban pynduh ïa ka jinglong jingman jong ka Wah Myntdu bad Mynkrem ha ki sngi ki por ban wan.
La sakhi ba ka jingheh jong ka surok ka long 25 metre hynrei ka jingpynhap khyndew ka long palat na ka jingkheiñ bad tur shaduh u pud u sam ka Myntdu. Nalorkata sngewsih ruh ban ïohi ba ka Mynkrem kadei ka wah kaba khuid bha hynrei mynta ka la jah bad ruh kiba bun ki tyllong um na khap lum ki la jah na ka daw ka jinglur khyndew ban shna surok.
U Bah Khroo L Pariat u la pynsngew hakhmat u S. Phanbuh ïa ki rai ha kaba ïadei ban ïada ïa ka Wah Myntdu khnang ban shngaiñ biang ka jingïoh umbam umdih ki nongshong Shnong, ki nongrep kba ha ki Pynthorneiñ Pynthorwah khamtam ban nanglah ban pynneh pynsah dohum dohwah kumjuh ki sawdon sawkun ka wah Myntdu.
Ki dkhot ka Khooid ya ka Wah Myntdu bad ki dkhot ka Jaiñtia Fishing and Environment Protection Association ki la ong, ka por ka la dei ban khat bad khlong noh ïa u shyiap ha ki bynta ka wah Myntdu khnang ba ka wah kan long kumba ju long mynshwa.
