Shillong, K’Lyngkot:
Ka Seng Kur Dkhar Sawkpoh ka la rakhe ïa ka Jubili Rupa ha ka 13 tarik u Kyllalyngkot, 2024 ha Maraikaphon, Sohra ha kaba da ki hajar ki dkhot kur bad ki Rangbah ka Seng Kur Dkhar na Ri lum Jaiñtia ruh ki la ïa wan sha kane ka dorbar.
La plie ïa ka jingrakhe jubili da kaba pynher ïa ka lama jong ka seng da u President, Bah Taining Dkhar Ngapkynta ryngkat bad ki Rangbah kur, ki longkmie bad ki dkhot executive jong ka seng.
Lyngba ka kyrwoh ba la phah, u Ma H Arthur Sawian, Patron ka Seng, u la ai ka jingkyrkhu kyrdoh ïa ka Seng bad ïa ki parakur ba kin nangkiew irat ha ka Tip-Briew Tip-Blei bad Tip-Kur Tip-Kha.
Ka Kong Khasimon Phanbuh, General Secretary barim jong ka seng, Padma Shree Kong Bertha G Dkhar Ngapkynta, ba la thaw ïa ka Braille code Khasi Grade I bad Grade II bad Bah Donavon Kharwanlang, u kongsan jong ka jingïalang, ki la ai jingkren halor ki “Mawbyrsiew” ba ki kpa tymmen jong ki, ki la tei bad pynshongrim ïa ka imlang sahlang ka longbriew manbriew bad ruh halor ka tien Phira – “Ka Tip-Briew Tip-Blei bad ka Tip-Kur Tip-Kha”.
Ha kaba sdang jong ka jingrakhe ïa ka jubili rupa, u Bah Taining Dkhar Ngapkynta u la pynkynmaw ïa ki longshuwa kiba la seng ïa ka Seng Kur ha ka snem 1999 bad ïa kito ruh kiba la shimti pateng ban ïa kit ïa bah ïa ki kam jong ka Seng Kur haduh mynta. U Bah Peter A Dkhar Sawian pat u la pynkynmaw bad pynsawa ïa u synñiang ba la noh sha ka imlang sahlang naduh ka spah snem kaba 18 bad 19 da ki longshuwa jong ka Kur ha ka liang ka pule puthi, ka seng-kam seng-jam, ka synshar ka khadar bad ka longbriew manbriew.
Ha kane ka sngi ka la don ruh ka jingsam khusnam sha kito kiba pass bha ha ki jingpule bad jingïalehkai Athlectic bad Karate bad ka jingot ïa u cake jubili rupa da ka Padma Shree Kong Theilin Phanbuh bad ka jingpynher ïa ki 25 tylli ki balun jubili rupa.
