Nongpoh, K’Lyngkot:
Kumba ju long manla u snem, ka Sohjer Committee jong ka Raid Marwet hapoh ka jinglamkhmat jong u Pa’iem Ken Syiem, Syiem ka Raid Marwet ha ka Sngi Balang ki la ïoh ban sdang biang ïa ka lehniam Sohjer kaba saw sngi lynter ba la pynlong ha ka shnong Baridua, Ri Bhoi District.
Ïa kane ka jinglehniam Sohjer jong ka Raid Marwet la wan ban plie paidbah da u Assistant Parish Priest jong ka Byrnihat Parish, u Fr. Kmenlang Nongrum ha ka jingïadon lang jong u Syiem ka Raid Marwet, ki longsan mansan, ki Lyngdoh, ki Pator jong ka Raid Marwet, ki nongïalam shnong na ki shnong bapher bapher bad ki khun ki hajar jong ka Raid Marwet.
Haba ai jingkren ha kane ka sngi, u Pa’iem Ken Syiem u la ïathuh ba kane ka jinglehniam kaba shisien shisnem jong ki khun ki hajar ka Raid Marwet ka dei ban ainguh ïa U Blei halor ki jingkyrkhu kiba U la theh sei ïa ki khun ki hajar jong ka Raid ha ka thung ka tep ka jong ki ha u snem uba la dep bad ban pynlong ïa ka jingkñia jingkhriam sha U Blei nongbuh nongthaw ïa u soh nyngkong uba ki la ïoh kheit hashwa ba kin bam pat ïalade ha une u snem thymmai.
Shuh shuh, u la ïathuh ruh ba kane ka jinglehniam Sohjer, kam dei satia tang ka tamasa ban pynbyrngia, hynrei ka dei ruh shirukom ban pynneh pynsah ïa ki riti ki dustur kiba la buh da ki longshwa manshwa pateng la pateng khnang ba ki khun samla kiba dang khie lung kin tip bad kin ïai bud ryntih ïa kane ka dustur u mynbarim jong ka Raid Marwet bad ruh pyntip ruh ba ka jingkñia jingkhriam ban ainguh aidem ïa U Blei nongbuh nongthaw yn pynlong ha ka 19 tarik mynta u bnai.
U Fr. Kmenlang Nongrum, uba dei u kongsan ha kane ka sngi sdang jong ka lehniam Sohjer haba kren u la ai ïa ka jingïaroh sha ki nongïalam jong ka Raid Marwet kiba dang kynmaw bad pynneh pynsah bad pynim ïa kane ka riti ka dustur jong ki longshwa manshwa ka raid wat lada ha kane ka thaiñ khappud, ka don ka jingshong shnong khleh da kiwei pat kiba bun ki jaidbynriew.
U Fr. Kmenlang Nongrum u buh ruh ka jingkyntu ïa ki khun ki hajar jong ka raid ba kin don ïa ka mynsiem jong ka jingïatylli, ka jingïaieid bad ban pynneh pynsah ïa kane ka jinglehniam pateng la pateng bad pynpaw ruh ïa ka khubor jong ka jingsngewtynnad bad ïaroh ïa u Syiem jong ka Raid Marwet uba la kular ban ai khusnam haduh T.1 lak ïa ki khun ki hajar jong ka Raid Marwet kiba ïashongkha para trai ri trai muluk kaba long kum shi bynta ban pynneh pynsah ïa ka jaidbynriew.
