Shillong, K’Lyngkot 18
Ha kawei ka jingjia ha West Jaiñtia Hills, kawei ka longkmie ka la ujor ba ha ka 15 tarik Kyllalyngkot, u pyrsa kurim jong ka u la shah dung da ka tari ha uwei u briew.
Katkum ka jingujor sha ki pulit, ka Kong S Hinge ka la ong ba ha ka por 8 baje mynmiet ha katei ka sngi, uwei u briew ïa uba la tip kyrteng kum u Bishar Hinge, 40 snem ka rta, u la thombor ïa u pyrsa kurim jong ka, u Jopfree Lawai, 22 snem ka rta, da ka tari ha ka ïing sah jong ki kaba don ha Nongbah Dongbiam. Na kane ka jingshah thombor, u Jopfree u la mynsaw bad la pynkit ïa u sha Dr Norman Tunnel Hospital ha Jowai ban ïoh jingsumar.
Ha kawei pat ka jingjia, u Silbinus Sukhlaiñ u la ujor ba ha ka 9 tarik Kyllalyngkot, ki briew ki bym lah ban ithuh ki la shna be-aiñ ïa ka shalan kaba ïadei bad u mawshun ba la ai sha u da u DFO, Jaiñtia Hills, bad ki la pyndonkam bakla ruh ïa ka kyrteng jong u Meckless Dkhar kum u nongbat ïa ka bai wai ban ïoh tih mawshun (Mining Lease Holder).
Sa ha kawei pat ka jingjia, u Tengku Ch Sangma u la pyntip sha ki pulit ba ha ka 17 tarik Kyllalyngkot, uwei u briew ïa uba la tip kyrteng kum u Sengjon Cheran Sangma, 25 snem ka rta, u la pynïap ïa la ka jong ka kmie, ka Dijak Ch Sangma, 45 snem ka rta, da kaba khrai ïa ka khlieh jong ka da ka tiar kaba nep ha ka ïing sah jong ki ha Chidaogre, Babadam, West Garo Hills, bad hadien ba u la leh ïa kane ka kam bymman, u la phet krad.
