Shillong, K’Lyngkot 19
U Bah Ronnie V. Lyng-doh uba dei u nongïalam ka liang pyrshah bad kumjuh u nongmihkhmat ka Congress na Mylliem Constituency, u la ong ba kum ka seng ka ai ka jingkyrshan ïa ka jingïakhih jong ka Voice of the People Party(VPP) kaba la ïakhih ha step jong ka Sngi Thohdieng hakhmat ka shlem treikam Secretariat ban thungkam biang ïa lai ngut ki ophisar ka Meghalaya Lokayukta kiba la shah weng kam.
Haba kren sha ki lad pathai khubor ha ka Sngi Thohdieng hapoh ka shlem treikam jong ka seng, u Bah Ronnie u la pynkynmaw ba ïa ka Lokayukta la thung ha ka por ka jingsynshar jong ka sorkar Meghalaya United Alliance (MUA) khnang ban pyntikna ba kan don ka jingkhuid- jingsuba ha ka saiñ hima-sima bad ka synshar ka khadar bad ban pyntikna ba ki paidbah kin ïoh ïa ka hok jong ki lyngba ka Lokayukta.
U Bah Ronnie u la ong ba ka seng hi ka ai ka jingkyrshan ïa ka VPP bad lada don kino-kino ki mat kiba ktah matïong ïa ka jylla, ka seng Congress kan don ryngkat lang bad kano-kano ka seng ne ka kynhun ruh kiba ïaleh na ka bynta ban ïoh ïa ka jingbishar kaba hok.
“Ngi kyrshan ba lada don kino-kino ki mat kiba ktah matïong ïa ka bha ka miat jong ka jylla, ngin ïai don ryngkat lang bad kano-kano ka seng saiñ pyrthei ne kano-kano ka kynhun kiba ïaleh na ka bynta ban ïoh ïa ka jingbishar kaba hok”, la ong u Bah Ronnie.
Shuh shuh utei u nongïalam u la ong ba ym tip satia ïa ka daw tynrai ba la weng ïa kitei lai ngut ki ophisar jong ka Meghalaya Lokayukta. Ïa katei ka daw yn hap ban wad jingshai bad lada dei ba ki la shah weng kam khlem daw, ka sorkar ka dei ban thungkam biang ïa ki.
“Ngim tip ïa ka daw tynrai ba kitei ki ophisar ki la shah weng kam hynrei ngi hap ban wad ïa ka daw namar kitei ki dkhot ka Lokayukta ruh ki dang dei hi ki briew ha kaba khadduh, ïoh lehse ki la leh bakla eiei hynrei ngin hap ban wad ïa ka daw bad lada ym don kano-kano ka daw ba ki la shah wengkam, ngi ruh ngi mynjur ba ki dei ban shah thungkam biang hynrei ngi hap hi pat ban wad ïa ka daw”, la kubur u Bah Ronnie.
