Shillong, K’Lyngkot 19
U Symbud Myntri Rangbah ka jylla, Bah Prestone Tynsong, u la kren shai ba ka sorkar kan nym thungkam biang ïa ki lai ngut ki ophisar kiba ka la dep weng kam na ka Lokayukta.
Haba kren sha ki lad pathai khubor ha ka Sngi Thohdieng, u Bah Prestone u la ong ba ka sorkar ka hap ban ïaid katkum ki kyndon jong ka aiñ Lokayukta bad kumba ka long mynta, ka Lokayukta ka la treikam pura bad ki ‘post’ ruh baroh ki la dap. U la ong ba ki kyndon ka Lokayukta ruh ki la kren shai ba ki ophisar ba shah thung kum ki dkhot ki dei ban long kiba dang don ha ka kam, ym kiba la shongthait.
“Ngin nym lah ban thung shuh ïa ki ophisar ba ngi la dep ban weng, watla ka don ka jingdawa na ka VPP ban thungkam biang ïa ki,” la ong u Bah Prestone bad bynrap “Nga ïohi jingdawa ka VPP ban thungkam biang, halor kaei ka nongrim yn thungkam biang, namar kumba ka long mynta, la dep ban thung da ki ophisar kiba dang don ha ka kam ha ki kam ba lait. Ngam sngewthuh ba balei ki hap ban leit sha surok ban kren ïa kine kiei kiei, khamtam haba ngi la dep ban pynshai ïa baroh ki bynta.”
“Ngi la leh la ka bynta bad ngam ïohi ba kan don ka jingleh bakla na ka sorkar ban wanrah da ki ophisar kiba dang trei bad don ha ka kam,” u la ong bad bynrap “Ka jingïakhih jong ka VPP ka paw ba kito ki ophisar ba la shah weng kam, ki don jingïadei bad ka VPP.”
U Bah Prestone u la ong ba ka Sorkar kan nym khot ïakren satia ïa ki nongïalam ka VPP namar ka la dep ban pynshai lut, hynrei lada ki kwah ban wan ïakren, ka sorkar ka long kaba kloi ban ïakren.
Ha kajuh ka por u Bah Prestone u la ong, ka don ka jingïapher hapdeng ki ophisar kiba la shongthait bad ki ophisar kiba dang don ha ka kam, kito kiba la shongthait kin trei katba ki sngewbiang bad kin ong ki la leh ïa kaei kaba dei ban leh bad lada don jingbakla ruh kan nym don jingktah satia ïa ki hynrei katba ki ophisar kiba dang don ha ka kam pat ki dang shah teh ha ki kyndon bapher bapher bad kumta ban leh bakla ruh kan nym long.
Nalor kane, haba thung ïa ki ophisar kiba dang don ha ka kam, ka sorkar kan siew tang ka TA/DA bad ka bai shong jingïalang, ym ba kan siew tulop, kumta haba ka sorkar ka la shong bad pyrkhat bha, bad halor kine ki nongrim sa thung da ki ophisar ha kito ki kam.
