Shillong, K’Lyngkot 19
U Symbud Myntri Rangbah ka Jylla, Bah Prestone Tynsong, u la ong ba ka Sorkar Jylla bad ka Sorkar Kmie ki la shim-khia ïa ka kam bad ki dang kwah ba ka jingïakren ïasuk bad ka seng Hynñiewtrep National Liberation Council (HNLC) kan dang bteng.
Haba kren sha ki lad pathai khubor ha ka Sngi Thohdieng, u Bah Prestone u la ong, “Nga kwah ban pynshai kdar ba hadien ba ngi ïoh ïa ka shithi na ka liang jong ka HNLC kaba ong ba ka la weng noh ïa ka jingkren ïasuk ba ka Sorkar kam long khuid mynsiem ne ba kam shym la shimkhia, nga kwah ban pynshai sha ki paidbah ka jylla jong ngi, khamtam sha ka jaidbynriew jong ngi, ba phin sngewthuh ba kam dei kumta.”
U Bah Prestone u la ong, ha ka jingïakren kaba nyngkong, ki mat kaba ki la buh hakhmat eh ka long ban pynthikna ïa ka ‘safe passage’ ne ka jingwan ba shngaiñ, kaba-ar ban weng noh ïa ka jingpynbna ïa ka HNLC kum ka seng lehnoh ban suk ka jingïakren, kaba lai ban weng noh ïa baroh ki case.
U Bah Prestone u la ong, ka Sorkar ka la leh ïa kaei kaba la kular bad ka khlem leh arsap, ha kaba ha ka jingïakren ba nyngkong, la lah ban wan pynpoi suk ïa ki dkhot jong ka bad ruh ban leit on suk, katba ha kaba ïadei bad ka jingkwah ban weng noh ïa ka jingpynbna seng lehnoh, ka dei ban ïaid shwa ka jingïakren ynda la dep ban pynbeit ïa baroh ki mat, yn sa ïakren ïa kata.
U la ong ba ki daw ba la buh da ka HNLC hakhmat halor ka jingweng noh ïa ka jingïakren ïasuk ka long ba ka sorkar India kam weng ïa ka jingpynbna seng lehnoh, hynrei dei ban sngewthuh ba ka Sorkar Jylla bad ka Sorkar Kmie ki la shimkhia haduh mynta, bad u la buh ka jingkyrpad ba kin wan sha ka miej ïakren.
Ha kaba ïadei bad ka jingdawa ban weng lut ïa baroh ki case, u Bah Prestone u la ong ba ka sorkar ka la pan na ka HNLC ïa ka thup kyrteng jong baroh ki dkhot kiba don case ba haduh katno phew ngut kiba la shah chargesheet ne shah pynngat ha ki kyndon aiñ, khnang ba kum ka sorkar kan lah ban peit bad bishar bniah bad ban lah pat ban ïakren ha ki jingïakren ban wan hynrei ka seng kam shym la lah ban pynbiang ne ai ïa kata ka thup kyrteng.
“Kum ka sorkar ngi sngew lyngngoh ba ha ka sngi ba kut jong u Nohprah, ba ka HNLC ka la weng noh na ka jingïakren ïasuk. Kumta ngi kwah ban pynshai ba ka Sorkar Jylla bad ka Sorkar Kmie, ngi dang kwah ba ka jingïakren kan dang bteng,” la ong u Bah Prestone bad bynrap ba halor ki daw kaba ki la ai bad kynnoh ïa ka sorkar ba kam shym la shimkhia, kane ka dei kaba bakla, ka sorkar ka kwah ban pynshai ba haduh mynta ka dang kwah ban ïakren, wan sha ka jingïakren, ka jingkhang ka dang plie, bad ka HNLC ka dei ban pyrkhat shihajar sien, wat pyrkhat lyngkot jingmut bad wat kynnoh sorkar, shim ïa kane ka kabu ksiar kaba phin nym ïoh manla ka por.
Ha kawei pat ka liang, u Bah Prestone u la ong ba ki nongïalam ka HNLC lada ki sngew ba kam long shngaiñ ban ïakren ha ki jaka ka sorkar, ka sorkar ka kloi ban ïakren bad ki ha kano kano ka jaka ba ki pynbeit.
U Symbud Myntri Rangbah u la pynshai ruh ba ka jingkwah ban ïakren ka dei ban long beit bad ki nongïalam ba hakhmat ka HNLC namar ka Sorkar ka kwah ban ïakren bad kiba lah ban shim ïa ka rai, ym bad ki dkhot kiba hadien ka jingïakren kin hap ban leit pyntip sha ki nongïalam ban shim ïa ka rai bad sa wan biang namar ka sorkar ka kwah ba kane ka kam kan poi noh sha kaba kut donkam ban ïakren markhmat bad kiba lah ban rai hangto-hangto.
