Shillong, K’Lyngkot 19
Ka seng Hynñiewtrep Youths’ Council (HYC) ha ka Sngi Thohdieng ka la leit tur kynsan sha shlem treikam jong u Director ka North Eastern Indira Gandhi Regional Institute of Health & Medical Science (NEIGRIHMS), Shillong.
Hynrei ha kane ka sngi, u Director Prof. (Dr) Nalin Mehta um shym la don hapoh ka shlem treikam, bad na ka liang ki dkhot ka HYC ki la leit ban ïakynduh noh ïa ka Deputy Financial Adviser.
Kane ka jingleit tur kynsan ki dkhot ka HYC ka long ban pynrem ïa ka NEIGRIHMS haba ïadei ka rukom pynlong eksamin bad ka rukom bhah thungkam hapoh kane ka hospital.
Haba kren sha ki lad pathai khubor, u Bah Roykupar u la ïathuh ba dang ha ki khyndiat bnai ka NEIGRIHMS ka la pynbna ka jingthep kam kum Nursing bad ki kam bapher bapher ha ka Group C bad Group D hynrei la ïohi ba kane ka hospital kam shym la pynlong hi ïa ki eksamin thep kam hynrei ka la ai kontrak sha kiwei pat ki kompeni.
U Bah Roykupar u la kam ba hadien ka jingwan shimti u Prof (Dr) Nalin Mehta kum u Director ka NEIGRIHMS, kane ka hospital ka la wanrah ka jingkylla haba ïadei bad ka jingthep kam da kaba pynkhamti sha ka AIMS bad kiwei ki shlem pule ba tbit tam hapoh India.
“Na ka liang ka HYC ka la thoh sha ka NEIGRIHMS ban pynsangeh shwa ïa ka eksamin hynrei ka khlem sngap bad hadien ba la mih ka risol, la shem ba bun kiba ïoh kam kum ki nos bad ha ki Group C bad D ki dei hi ki briew na kiwei ki jylla bad ki trai ri trai muluk kiba la trei ha kane ka hospital kumba 5-7 snem ki hap mih noh na ki kam ba ki trei,” la ong u Bah Roykupar.
Une u nongïalam ka HYC u la kam ba kane ka jingai kontrak sha kiwei ki shlem pule ban pynlong ïa ka eksamin thep kam ha NEIGRIHMS, ka pynduh mynsiem ïa ki samla trai ri trai muluk.
U la ïathuh ba dang shen ka NEIGRIHMS ka la khot thep kam biang na ka bynta ki kam ha Group C bad D bad la lap biang ba ïa ki eksamin la pynlong da ki kompeni nabar ka jylla.
