Shillong, K’Lyngkot 19
Ka kynhun Myntri jong ka Sorkar Jylla kaba la shong jingïalang ha ka Sngi Thohdieng ka la rai ban pynduh noh ïa ka Meghalaya Civil Task Force Act, 1974.
Haba kren sha ki lad pathai khubor hadien ba la wai ka jingïalang, u Myntri Rangbah ka jylla u Conrad K Sangma u la ong, ïa ka Meghalaya Civil Task Force Act la thaw naduh u snem 1974 bad kumta namar ba ki la don ki jingkylla ha ka rukom treikam bad ka jingshisha ka long ruh ba ïa katei la donkam ha katei ka por bad haba la thaw ïa ka Meghalaya Civil Task Force ka long kaba ïapher bad kane ka sngi jong ka pyrthei mynta bad ka task force kam long shuh kaba donkam haduh katta katta ha kaba baroh ki nongtrei jong ki tnat bapher bapher ki la pyndep ïa baroh ki jingdonkam bad ma ki baroh ki la lah ban shongthait na ka kam ne ki la shim ïa ka VRS.
“Kumta katei ka aiñ ka la long ka bym donkam shuh bad kumta ban pynthikna ba kan ym don kano-kano ka kynrum-kynram, ka kynhun Myntri ha kane ka sngi ka la rai ban pynduh noh ïa ka bad ki la don 3 tylli ki Post kiba la don bad ïa kine yn sa pynrung noh ha ka tnat sorkar ha kiwei pat ki tnat bad ïa kane ka jingpynduh noh ïa kane ka aiñ yn sa rah ha ka ïingdorbar thawaiñ jong ka jylla,” la ong u Myntri Rangbah.
Ha kawei pat ka khubor, ka jingïalang jong ka Kynhun Myntri ka la ai ka jingmynjur ïa ka kyrteng jong ki nong ïohpdiang ïa ka Meghalaya Day Award bad ïa ki kyrteng yn sa pynbna paidbah ha ka jingrakhe ïa ka Meghalaya Day ha Tura. Nalor kane ka Kynhun Myntri ka la ai jingmynjur ruh ïa ka thup kyrteng jong ki heh sorkar ki ban pynher ïa ka lama jong ka ri bad ban shim ïa ka Salute ha ka jingrakhe ïa ka Republic Day ha ka 26 tarik u Kyllalyngkot ha ka jylla.
