Shillong, K’Lyngkot 19
Hadien 52 snem jong ka jingïoh ïa la ka jong ka jylla, ka Meghalaya ha ka Sngi Saitjaiñ kan sa pyllait paidbah ïa la ka jingrwai ieit ri ne ka ‘State Anthem’.
U Myntri Rangbah ka jylla u Conrad K Sangma haba pynbna ïa kane ha ka Sngi Thohdieng, u la ong, “Nga dap da ka jingkmen ban pynbna sha phi baroh ba ka jingïalang jong ka Kynhun Myntri kaba la shong jingïalang ha ka Sngi Thohdieng ka la mynjur ïa ka State Anthem.”
U Conrad u la ong ba hadien ka jingmynjur jong ka Kynhun Myntri, un sa pyllait paidbah ïa ka jingrwai state anthem ha ka sngi rakhe ïa ka Meghalaya Day ha Tura ha ka Sngi Saitjaiñ.
“Kane kan dei shisha ka bynta kaba kmen bad sngew sarong na ka bynta jong ngi baroh namar naduh ba la ïoh la ka jylla haduh mynta, ngim don satia ïa ka jingrwai ieit ri,” la ong u Conrad.
“Nga ai khublei ïa ka tnat Arts and Culture bad sha baroh kito kiba la ïadon bynta ha ka ban shna ïa kane ka jingrwai na ka bynta ka jylla (state anthem) bad nga kwah ruh ban ai khublei halor ka jingtrei shitom jong ki ban thaw ïa ka jingrwai kaba ki la thoh kynthup ki sur kynud jingrwai,” la ong u Conrad.
