Shillong, K’lyngkot 19
Ki pulit jong ka nongbah Shillong ha ka Sngi Thohdieng ki la kulmar jingmut namar katba ki dang ap ïa ki nongïalam ka VPP kiba thmu ban wan tur hakhmat Secretariat, la wan mih kynsan-kynsan da ki nongïa-lam ka Hynñiewtrep Youths’ Council (HYC) hapoh ka jingïalam u Bah Roykupar Synrem kum u President bad palat phew ngut ki dkhot ban wan dawa ILP bad ktien Khasi.
Ha kane ka jingleit tur ki nongïalam HYC, ki pulit ki la ïoh ban pynsangeh noh hakhmat ka shlem treikam PWD kaba don pyrshah bad ka State Central Library bad ki dkhot ka HYC ki la shong kyllaiñ myngngor hapdeng surok ryngkat ka jingpyrta.
Kane ka jingïakhih namar ïoh kan ktah ïa ka leit ka wan jong ki paidbah, ki pulit ki la pynkhreh ban kit noh da ka bos ïa ki nongïalam ka HYC. Kumta namar bym don ba treh, ki pulit ki la shah noh ïa ki nongïalam ba kin ïeng ban pyrta hakhmat u mot Kiang Nangbah kaba don hakhmat Civil Hospital Shillong.
Haba ïakren bad u Bah Roykupar Synrem kum u President, u la ïathuh ki thmu ban leit sha jingïalang ka NEC haba ki ïoh jingtip ba u wan u Amit Shah hynrei ka Deputy Commissioner ka la pynjari da ka 144 CRPC bad la shah pynsangeh noh shiteng lynti, bad kumta ki la shong noh hapdeng surok.
“Namar ki pulit ki mut thep ha bos ban ïalam sha madan Malki hynrei namar ka jingbym treh, ngi la ïoh ban ïeng hangne hakhmat u mot Kiang Nangbah ban pyrta” u la ong. U la ong ba ka jingdawa mynta ka long ba u Amit Shah un jubab noh ban pynurlong ïa ka ktien Khasi bad ILP namar ka dei ka jingdawa kaba la slem jong ka jaidbynriew.
