Shillong, K’lyngkot 19
Ki nongïalam ka Voice of the People Party (VPP) ki la pynthikna ba ha ka Lah Sngi U Blei kata ha ka 22 tarik mynta u bnai kin sa leit tur biang hakhmat ka Secretariat ban pynbor ïa ka sorkar jylla ba kan thung biang ïa lai ngut ki ophisar ka Lokayukta.
Kane ka jingpynbna ka dei hadien ba ki la shah khang lynti ha ki pulit hakhmat ka shlem treikam Deputy Commissioner ka East Khasi Hills District kaba la long ha ka Sngi Thohdieng.
Ha kane ka jingleit tur sha Secretariat la ïalam da lai ngut ki MLA, kata u Bah Adelbert Nongrum, Bah Brightstarwell Marbaniang, Bah Heavingstone Kharpran bad u kyrtong ba la dep pynbna ban ïakhun ïa ka ilekshon MP u Dr. Ricky Syngkon.
Haba ïakren bad u Dr. Ricky Syngkon uba dei ruh u General Secretary ka VPP, u la ïathuh ba ka seng kan bteng biang ban wan ïakhih hakhmat Secretariat haduh ba ka sorkar kan thung biang ïa ki ophisar kaba ka sorkar ka la pynduhnoh ha Lokayukta.
Na liang u Dr. Batskhem Marboh uba dei u nongaiktien ka VPP, u la ong ba dei ka sorkar NPP kaba la thung ïa kine ki ophisar ha ka Lokayukta bad dei kane kajuh ka sorkar kaba la pynduh noh, kumta kumba ka seng ka ïeng ban ïakhun ïa ka kam bamsap kan ïeng beit haduh ba ka sorkar kan thung biang ïa ki ophisar ka Lokayukta.
Katba u Bah Brightstarwell Marbaniang u la ong ba lada ïa ki MLA kiba la jied da ki paidbah ym shah ban tur sha Secretariat, kane ka pyni ïa ka jingsynshar donbor kane ka sorkar.
U la kynthoh ruh ïa ki pulit kiba kah durkhmat namar ka buh jingma namar wat u ‘riew paidbah u lah ban wan ban shim kabu haba u kah ïa ka durkhmat.
Nalor kata, u la ong ba u pulit u dei ban don ka kyrteng khnang ba ki paidbah bad ki ophisar sorkar kin ithuh.
