Tura, K’Lyngkot 19
Ki pulit ka Tura, West Garo Hills District ki la ïoh ban kem noh ïa uwei u briew uba la shah kynnoh ba u la pynjop pynpra ïa kawei na ki bynta jong ka Pa Togan Nengminza Athletic Stadium, Tura.
Kane ka jia hadien shi sngi ba la lah ban pyndep ïa ka jingïalehkai Athletics jong ka 5th Meghalaya Games 2024 ha katei ka jaka ha kaba ka West Jaiñtia Hills ka la ïoh ban khur ïa ka nam lahduh da kaba khur 17 tylli ki takma ba kynthup ïa 8 tylli ki takma ksiar, 4 ki takma rupa bad 5 ki takma rnong.
Kat kum ka kyrwoh ba la pyllait da ka Director ka tnat Sports & Youth Affairs jong ka Sorkar Jylla ka Kong Isawanda Laloo, la ong ba ha ka step jong ka sngi Thohdieng (19 tarik) uwei u briew u la leit rung ha Pa Togan Nengminza Athletic Stadium kaba dangshu dep plie shen ha Tura, u la pynjot pynpra ïa kawei na ki bynta jong ka Synthetic Athletic Track.
“Ïa utei u briew la kem da ki pulit bad ka jingtohkit ka dangïaid mynta,” la ong ka kyrwoh.
La ong ba kino kino kiba pynjop ïa ki jingdon jingem jong ka Sorkar kin ngat ha ka jingshah pynshitom namar kine ki jaka ïalehkai kiba don ha ki shnong ki thaw ki long ba ka bynta ban kyntiew ïa ki jingïalehkai bad ym ban pynjot pynpra ïa ki.
Ka jingdon ïa ka Pa Togan Nengminza Athletic Stadium kaba don ha Tura kan ka jingmyntoi kaba khraw na ka bynta ki khynnah ïalehkai athletic jong ka thaiñ, ki khynnah skul bad ruh ki samla ba kin lah ban pynjanai ïalade ha ka kam ïalehkai. Hynrei ka jingpynjop pynpra kan long ka jingduhnong ïa ki khynnah bad kane ka pyni ïa ka jingbym kheiñ snep ïa ki jingdon ki jingem ha ka im lang sahlang, la ong ka kyrwoh.
Ïa kane ka jaka ïalehkai la plie pyrda myn ha ka 12 tarik mynta u bnai da u Myntri Rangbah ka Jylla u Conrad K Sangma ha ka jinglut kaba T. 16.02 klur bad la ainam ha ka kyrteng u nongïaleh laitluid, u Pa Togan Sangma.
