Shillong, K’lyngkot 19
Ka jingïakhih jong ka seng saiñ pyrthei ka Voice People of the Party (VPP) hapoh ka jingïalam jong lai ngut ki MLA bad u kyrtong MP Lok Sabha uba dei u General Secretary ka seng, ka la pynktha khlieh ïa ki pulit kiba la ap dangstep hakhmat ka shlem treikam Secretariat namar ki hap ban patan jubor ïa ki nakhmat Secretariat haba la dep pynjari da ka kyndon 144 CrPC.
Kane ka jingïakhih jong ka VPP ka long ban dawa na ka sorkar jylla ban thungkam biang ïa lai ngut ki ophisar kiba la shah weng na ka Lokayukta.
Haba phai ha kane ka jingïakhih, la ïohi ba ki pulit ki la pynkhlaiñ pahara naduh dangstep ha ka 19 tarik mynta u bnai hadien ba la pynbna ki nongïalam ka VPP ban leit ïakhih hakhmat Secretariat.
Haba la dap 10.30 mynstep la ïohi ba la wan nyngkong u MLA ka North Shillong u Bah Adelbert Nongrum ban wan ïeng hakhmat pyrshah ka khyrdop ban rung sha Secretariat, hangne la ïohi ba ki pulit bad ki majistor ki la wan ban ïakren ïa u.
Kat dang ïaid ka por la ïohi ba ki dkhot ka VPP ki la nang tur hynrei la shah khang lynti noh mar shu poi ha IGP pyrshah ka State Central Library. Katba u MLA ka Mawlai u Bah Brightstarwell Marbaniang uba wan na ki thaiñ Khyndailad ki pulit ki la khang lynti ïa u bad la ïohi ba ki la sdang ban tan jubor ynda u la poi hakhmat shlem treikam DC. Namar ki pulit ki la pynkhlaiñ pahara hakhmat Secretariat, ki nongïalam ka VPP naduh ki lai ngut ki MLA kata u Bah Adelbert Nongrum, Bah Brightstarwell Marbaniang, Bah Heavingstone Kharpran bad u General Secretary ka VPP u Dr. Ricky AJ Syngkon ki la ïeng noh shi jaka hakhmat ka shlem treikam Deputy Commissioner East Khasi Hills District kaba don syndah ka Meghalaya High Court.
Katba ka por ka dang ïaid ki nongïalam ka VPP ki la shim ïa ka rai ban phah leit tur da lai ngut ki MLA sha Secretariat. Haba lai ngut ki MLA ki la thmu ban tur sha Secretariat ki pulit ki la khang lynti, katba ar ngut kata u Bah Adelbert Nongrum bad Bah Heavingston Kharpran ki dang ïa pyni bor bad ki majistor, u MLA ka Mawlai Bah Brightstarwell u la tur beit shakhmat bad dei hangne u majistor shynrang u la ïeng hakhmat ban kah lynti bad la wan tur sa ki pulit ban kah lynti bad poi syndon sha kham kyndong hadien ka jingïapyni bor u MLA ka Mawlai bad ki pulit.
Hangne ki dkhot ka VPP kiba la ïeng shi jaka haba ki la ïohi ba shah khynñiat u Bah Brightstarwell ki la leit ban tur ban ïarap ïa u, hynrei namar ka jingwan pynjai-jai noh jong ar ngut ki MLA, kata u Bah Adelbert bad Bah Heavingstone, ki pulit bad ki dkhot ka VPP ki la sangeh ka jingïania. Ynda haba ki nongïalam ka VPP ki la shong baroh shisngi hakhmat shlem treikam DC, ki la rai ban bteng biang ban sdang ïa ka jingïakhih biang ha ka Lah Sngi U Blei kata ka 22 tarik mynta u bnai hakhmat Secretariat haduh ba ka sorkar kan da thung kam biang ïa ki ophisar ka Lokayukta.
