Khliehriat, K’Lyngkot 19
Uwei u briew ïa uba la tip kyrteng kum u Rollingson Dkhar na ka shnong Jalaphet, East Jaiñtia Hills, u la shah kynnoh ba u la sei da ka ‘pistol’ bad dawa pisa haduh T. 15 lak na ki saw ngut ki nongshong shnong ka Saipung bad u la ai por san sngi ban siew ïa kane ka pisa lym kumta u la byrthen ban wan siat ïa ki.
Katkum ka ejahar ba la ujor ha u heh pulit ba dei peit ïa ka thanat Saipung, la kynnoh ba ha ka 17 tarik Kyllalyngkot ha ka por kumba 4:30 baje janmiet, khlem ka jingtip ki nongïalam shnong Saipung, u Rollingson Dkhar ryngkat ki paralok jong u, ki la wan da san tylli ki kali bad pynthut ïa ka shongsuk shongsaiñ jong ki nongshong shnong ka Saipung.
La kynnoh ba u Rollingson bad ki paralok ki la ktah kti ïa u Priceless Darnei haduh ba u la hap ban leit shah sumar ha PHC.
Nalorkata la kynnoh ruh ba ki la rung jubor hapoh ka ïing jong u Lalramzoma Nampui kumjuh ha kamra thiah bad lynthaw ïa ki ‘Mobile Phone’ jong ki trai ïing bad ktah kti ruh ïa kawei ka longkmie kaba 50 snem rta bad ki khun jong ka kiba don ha ka rta 14 bad 16 snem.
Shuh shuh la kynnoh ba ha kum kane ka por u Rollingson u la sei da ka ‘pistol’ bad u la dawa pisa haduh T. 15 lak na u Lalramzoma Nampui, u Priceless Darnei, u Moia Ngirsim bad na u Ruaiia Darnei bad u la ai por ban siew hapoh san sngi lym kumta un wan biang ban siat ïa ki.
Ha kaba ïadei bad kane ka jingjia, da ki spah ngut ki nongshong shnong ka Saipung ki la pynlong ka jingïaid paidbah ha ka Sngi Thohdieng ha ryngkat ka jingrah ïa ki jingthoh.
Ha kane ka jingïaid la ïashim bynta naduh ki longkmie longkpa, ki samla shynrang kynthei kumjuh ki seng bad ki la dawa ba dei ban kem bad pynshitom ïa u Rollingson bad ïa ki paralok jong u.
