Shillong, K’Lyngkot 19
Ka khubor na ki pulit ha ka Sngi Thohdieng ka ïathuh ba uwei u briew ïa uba la tip kyrteng kum u Mohit Jain u la ujor ba ha ka 15 tarik Kyllalyngkot, ki la don ki runar ki bym lah ban ithuh kiba la ïoh ban rong ei haduh T. 117,900 na ka Pnar Service Station kaba don ha Ladrymbai, East Jaiñtia Hills.
Nalorkata, ha kawei pat ka jingjia, ki pulit ki la ïoh jingtip ba ha ka 18 tarik Kyllalyngkot ha ka por kumba 3:10 mynstep, ki runar ki la thmu ban tuh masi na kawei ka kali Bolero Pik-up (AS-17C-1832) na ka shnong Jamanggre, South West Garo Hills. Hynrei la ong ba ki nongshong shnong ki la ïa mih bad ki la beh ïa kitei ki runar haduh ka thaiñ Rangatari bad ha kane ka jaka, ki runar ki la iehnoh ïa ka kali ryngkat bad hynñiew tylli ki masi, bad ki la phet krad.
Ha kawei pat ka jingjia, u Sirdar ka shnong Mawlong ha Eastern West Khasi Hills ryngkat bad lai ngut kiwei pat ki la ujor ha ka 16 tarik Kyllalyngkot, 2024 ba ha ka 31 tarik Nohprah, 2023, ha ka por kumba 10:30 mynmiet, ka Dorbar Shnong ka la pynlong ïa ka jingkhynra kyiad ha ka ïing jong kawei ka briew ïa kaba la tip kyrteng kum ka T.L. Mawlong kaba don ha kane ka shnong.
La ong ba ha ka jingkhynra, la lap ïa ka kyiad ba thmu die be-aiñ bad ïa kata ka kyiad la aiti noh sha ka tnat Excise. Hynrei kitei ki nongujor ki la kynnoh ba katei ka briew ka la ïakhun pyrshah ïa ka Dorbar Shnong bad ka la ktah kti bad byrngem ruh ïa ki dkhot ka Seng Longkmie.
Nalorkata, sa ha kawei pat ka jingjia, ka la don ka jingujor ba ha ka 17 tarik Kyllalyngkot ha ka por 5 baje janmiet, lai ngut ki briew ba kynthup ïa uwei u khynnah ki la shah kem bad la ïoh ban kurup na ki ïa san tylli ki ODC Battery na ka kali kaba ki la shong ha kawei ka shnong kaba hap ha thanat Nartiang, West Jaiñtia Hills. La kynnoh ba kine ki Battery ki dei kiba la tuh na Ksehrynshang Telecom Tower Ltd.
Shuh shuh ha kawei pat ka jingjia, u Kedias Nongshli na ka shnong Umkynsier ha Ri-Bhoi, u la ujor ba ha ka 14 tarik Kyllalyngkot ha ka por kumba 8 baje mynmiet, uwei u briew ïa uba la tip kyrteng kum u Wanlang Nongphlang, 23 snem ka rta, u la shoh la dat ïa u khun jong u, u Erlin Nongshli, 32 snem ka rta.
Sa ha kawei pat ka jingjia, u Soyod Ali u la ujor ba ha ka step jong ka 15 tarik Kyllalyngkot, ki runar ki la leit rung ha ka kudam jong u ha ka shnong Patranga, West Garo Hills, bad ki la tuh 37 Quintal u kwai tyrkhong ba la buh ha kawei ka trok.
Ha kawei pat ka jingjia, u Hallin Momin u la ujor ba ha ka 16 tarik Kyllalyngkot, ki runar ki la tuh ïa ka thuk-thuk jong u (ML-13A-4564) na ka shnong Mongre, North Garo Hills.
