Shillong, K’Lyngkot 19
Kiba bun na ki seng saiñ pyrthei ha jylla ki la pynkhreh shaid-shaid ïalade na ka bynta ka ilekshon Member of Parliament (MP) ka Lok Sabha kiba kynthup ïa ka Shil-long bad ka Tura Parliamentary Constituency ka ban sa long shen. La ïohi ruh ba ki la don katto-katne tylli ki seng kiba la pynpaw ïa ki kyrteng jong ki kyrtong ki ban ïakhun na ka bynta katei ka ilekshon na ki seng jong ki.
Na ka liang ka seng Congress la ïohi ba ka khlem pat shym la pynbna satia ïa ka kyrteng jong ki kyrtong ki ban ïakhun ïa katei ka ilekshon na kitei konstitwensi.
Ha kaba ïadei bad kane, u Bah Ronnie V. Lyngdoh uba dei u nongïalam ka seng Congress, haba kren sha ki lad pathai khubor ha ka Sngi Thohdieng ha ka shlem treikam ka seng, u la ong ba ka Meghalaya Pradesh Congress Committee (MPCC) kam pat shym la rai satia ïa ki kyrtong ki ban ïakhun ïa ka MP ilekshon na Shillong bad Tura Parliamentary Constituency.
U la ïathuh ba ka seng ka la khot aplikeshon ïa kino-kino kiba kwah ban ïakhun ïa katei ka ilekshon na kitei artylli ki konstitwensi. Hadien ka jingthep kyrteng jong kiba kwah ban ïakhun ïa katei ka ilekshon, na ka liang ka MPCC kan sa shong bad bishar ha ka jingïalang jong ka ban rai ha kaba ïadei bad ki kyrtong kiba kan sa jied ban pynïeng.
Haba kylli la hato ka seng kan khot aplikeshon tang na ka bynta ka shuki hapoh Tura ym na ka bynta ka Shillong bad kan pynïeng beit da ujuh u kyrtong uba dei u MP mynta napoh ka Shillong Parliamentary Constituency kata u Bah Vincent H. Pala, u Bah Ronnie u la ong ba ym don mano-mano ba lah kheiñ sting ba tang namar ba ki la dei lypa ki MP ne ki MLA ne ki MDC ba kin ïoh suk ban ïakhun ïa ka MP na ka tiket jong ka seng Congress.
“Mano-mano kim lah ban kheiñ sting ba tang namar ba nga dei u MP ne u MLA ne u MDC ba kin shu ïoh suk ïa ka tiket hynrei ngi don da ki rukom ïaid kiba hap ban bud”, la kubur u Bah Ronnie.
