Jowai, K’Lyngkot 21
Kum ka jingdon bynta lang ha ka Ram Mandir ka ban sa plie paidbah ha ka Lah Sngi U Blei ha Ayodhya, Uttar Pradesh, ki riewngeit Hindu ha Jowai ha ka Sngi U Blei ki la pyndep ïa ka Kalash Yatra da kaba leit tong ïa ka um ban rah sha ki jaka mane (Mandir).
Ha Jowai ki riewngeit Hindu kiba dei ki kynthei ryngkat ki khiew khyndew ki la leit tong ïa ka um na Syntu Ksiar ryngkat ka jingsynran lang ki shynrang kiba la rah ïa ki lama ryngkat ka bom bad ki jingsur jingtem.
Hadien ka nguh blei na u Pandit, ki la mih na Syntu Ksiar da ki thuk-thuk katba ki kynthei ki la rah ïa ka um da ka kjat haduh ban da poi ha Ram Mandir kaba don ha Ïawmusiang khnang ban pyndep ïa ka jinglehniam.
Haba ïakren bad u Pawan Sanchety General Secretary ka Vishwa Hindu Parishad, Meghalaya u la ong, ha ka por ba shna ïa ka Ram Mandir ha Ayodhya la rah ïa ka um bad khyndew na ka Wah Myntdu kum ka jingdon bynta lang ha ka jingshna ïa ka Mandir.
