Jowai, K’Lyngkot 21
Ka lympung ki khynnah Seng Khasi Seiñ Raij kaba 18 kaba la long ha ki arsngi lynter ka la poi noh sha kaba kut ha ka Sngi U Blei ha madan Siej Kynden jong ka shnong Nongkynrih kaba hap ha Laskeiñ Block, West Jaiñtia Hills.
Ha ka sngi pynkut ïa kane ka lympung ki khynnah, ka la long kaba iphuh iphieng ha ka jingwan ïashim bynta jong ki khynnah na kylleng sawdong ki lum Khasi-Jaiñtia haka jingpeit ki nonghikai jong ki shlem hikai Ñiamtre-Niam Khasi bapher bapher ryngkat ki riam ki beit kiba ishongkun shongkhia.
Ha ka por mynstep ïa ka lympung la pynïaid da ka Tyngkai I Man Synnah bad ka Wailadmi Dkhar katba u Mehipaia Suchiang jong ka Seiñ Raij Nongkynrih u la ai ka nguhblei nguhsyiem bad ki kyntien pdiang burom na ka Kamwadamang Synnah.
Ki arngut ki khynnah kiba ai ka jingkren, ki long ka Dawakiru Malang na Seiñ Raij Jaraiñ, East Jaiñtia Hills kaba la kren halor ka phang ‘Pynkyntang yei rynïeiñ da ki adong Blai’ katba ka Klistina Synteng ka la kren halor ka phang ‘Ka bynta ki khynnah ha ka Seng Khasi-Seiñ Raij’ kaba mihkhmat na ka Seng Khynnah Seng Khasi Pomlakrai, Mylliem Pyllun.
Ha kane ka lympung la wan sakhi da ki Dolloi, shakri Niam jong ki Raij ki shnong, longkmie longkpa, samla, bad ki riew rangbah na ki tnat seng Khasi Seiñ Raij bapher bapher.
U Rangbah Aiban Swer, (Retired) Additional Director Soil & Water Conservation Department, sorkar Meghalaya ha ka jingkren kum u kongsan u la ïaroh ïa ki nongïalam kiba shim ïa ka jingkit bakhia na ka bynta ban ïalam lynti ïa ki khynnah Seng Khasi-Seiñ Raij ban tip ïa ka niam ka rukom.
U la kyntu ïa ki samla, longkmie longkpa ban bat bad ri sumar ïa ka jinglong kyrpang ka jaitbynriew Hynñiewtrep Hynñiewskum naduh ka niam ka rukom, ka dustur riti khnang ba ka pateng hadien kan tip ban bud ïa kaei kaba ki longdien mandien ki ïalam lynti.
U la sneng la kraw ruh ïa ki khynnah bad samla ban ri ïa ka akor burom na ïing habar bad ban saiñdur saiñdar ïa ka longbriew manbriew kaba bha ha ka nongrim jong ka Tipbriew-Tip Blei bad Kamai ïa ka Hok.
Kyrpang u la kyntu ïa ki nonghikai ban ïaleh ban pynjanai ïa ka jingtip bad jingshemphang katkum ka jingïaid jong ka juk ba kin lah ban khring ïa ki khynnah khamtam ban saiñdur ïa ki da ka jingieid, jingïatylli bad burom markylliang.
La pynkup burom kyrpang ruh ïa ka Kong Mera Dkhar kaba dei kawei ka longkmie kaba la seng ïa kane ka Lympung Khynnah Seng Khasi-Seiñ Raij.
