Mawkyrwat, K’Lyngkot 21
Ka Dorbar Pyllun ba 17 jong ka Synjuk ki Kynthei Katholik Nongstoiñ Diocese ka la pynlong ïa ka jingïaseng kyrpang ha ka Sngi U Blei da kaba buh ruh ïa ka phang pdeng kaba ong “Suk ma phi kaba la ngeit ba ka Ktien U Trai kan sa urlong da shisha”.
Ïa katei ka jingïaseng kaba la pynkut noh mynta ka sngi, la sdang naduh ka Sngi Thohdieng jong ka taïew bad la pynlong ha Mary Help of Christians Parish Mawthong, South West Khasi Hills District.
La sdang ïa ka jinglehniam da ka jingtyrwa ïa ka jingkñia ïa Mass Bakhuid da u Rt. Rev. Wilbert Marweiñ uba dei u Lyngdohsad ka Jyllaniam Nongstoiñ ha ryngkat ka jingïadonlang u Fr. Anselm Nonglang, u Fr. Sylvester Nongsiej, Parish Priest ka Mawthong Parish, bad ki paid riewngeit jong ka Balang Katholik kiba la wan ban sakhi lang ïa katei ka sngi na ki Parish bapher bapher.
Ha katei ka sngi la ïadonlang ruh kiwei kiwei ki Lyngdoh, ki ‘riewniam, u Fr. Eugene Thyrniang uba dei u Spiritual Director jong ka Synjuk ki Kynthei Katholik Jylla Niam Nongstoiñ, ka Kong Dorabel Kharkongor, President ka Synjuk ki Kynthei Katholik Jylla Niam Nongstoiñ, ka Kong Memorial Syiemsad General Secretary ka Synjuk bad kiwei kiwei.
Ha ka jingïaseng nohphai sngi shuwa ban pyndep ïa ïa ka jingmane Sakrament, u Fr. Remiky Niangti uba la wan kum u nongkren ha ka jingïalang ka Synjuk, u la ïoh ban sam ïa ka jingai jingmut lem sha ki longkmie ban puson ïa ka Ktien U Blei da kaba u la pynkynmaw ïa ka kmie u Samuel u nongïathuh lypa kaba dei ka Hannah, bad u la ong ka jingriewblei jong ka Hannah, ka jingïaineh jong ka ha ki jingduwai khlem da pud, ka jingïaishah ïa ka jingshah lehbeiñ ka pynlong ïa U Blei ba un ai u khun uba la dei syndon uwei na ki nongïathuh lypa u bakhraw bha ha ki por jong ka Jutang Barim.
Kumta u la ong ba ka jingstad jong ka longkmie ban sharai ïa la ki khun ka dei tang ka jingduwai bad namarkata u la kyntu ïa ki longkmie ba kin duwai.
