Jowai, K’Lyngkot 21
U Rollingson Dkhar u la kyntait ïa ka jingshah kynnoh ba u la sei ‘pistol’ bad dawa pisa haduh T. 15 lak na ki 4 ngut ki nongshong shnong ka Saipung, East Jaiñtia Hills bad u la kyntait ruh ïa ka jingshah kynnoh ba u la ktah kti ïa kawei ka longkmie bad ïa ki arngut ki khun jong ka.
Kum ban shu pynkynmaw ki nongshong shnong ka Saipung ba kynthup u Waheh Shnong bad sengbhalang ki la mudui da ka ejahar pyrshah ïa u Rollingson ha ka 19 tarik Kyllalyngkot ha thanat Saipung.
U Rollingson, haba kren bad ki lad pathai khubor ha ka Sngi Saitjaiñ u la kyntait ïa ka jingshah kynnoh bad pynshai ba ha ka 8 tarik Kyllalyngkot ha ka por 9.00 baje mynstep ki la don kiba pyntip sha u, ba don ki briew kiba wan ban mait bad pom ïa ki dieng kseh bad dieng khlaw kiba don hapoh ka bri jong u kaba don ha krem Dakha kaba don hadien ka shlem treikam jong ka Saipung C&RD Block.
U Rollingson u la lap ba ki briew kiba donkti ban pom ïa ki dieng ki long u Priceless Darnei, u Lalramzoma Nampui, u Riamthanga Thianglai bad u Ruaiia Darnei.
Kumta u la khot ïa ki ban ïakynduh ha Kupleng Outpost, East Jaiñtia Hills ha ka 9 tarik Kyllalyngkot, hynrei kine ki briew ki khlem wan wat hadien ba u la ap ïa ki baroh shisngi.
Kumta la pynbeit ban ïakynduh ha ka 10 tarik Kyllalyngkot, hynrei hangne ruh kitei ki briew ki khlem wan satia.
Hadien kane, ha ka 17 tarik Kyllalyngkot, ki la don kiba pyntip sha u Rollingson ha ka por 10.00 baje mynstep ba la don biang kiba wan ban pom dieng ha kajuh ka jaka.
Kumta u la hiar wut-wut sha katei ka jaka ha kaba la lap ïa kawei ka trok kaba don ïa u nombor ML-11-6822 kaba dang thep dieng bad kiba bun ki dieng ki dei kiba la dep pom bad dep pynkit bun kali.
Ha kane ka por u la khot ïa u nongñiah ïa ka trok bad u nongñiah u la ïathuh ba la phah da u Priceless Darnei bad une u nongñiah u la ïalam ïa u Rollingson sha ïing jong u Priceless, bad u Priceless u la phla ba dei ma u, uba phah ïa u Lalramzoma Nampui, u Riamthanga Thianglai bad u Ruaiia Darnei ban pom ïa kitei ki dieng.
Namar ka jingbym ïakynduh bad kine briew, na ka liang u Rollingson u la ong ïa u Priceless ba u dei ban siew ïa kine ki dieng ba la dep pom bad hadien kane u Rollingson u la leit phai noh.
U Rollingson u la pynshai ba u la leit marwei shapoh ka shnong Saipung katba u nongñiah ïa ka kali jong u, u don hapoh kali ym kumba la kynnoh da ki nongshong shnong ka Saipung ba u Rollingson u la wan bad ki paralok.
Ha kaba ïadei bad ka jingkynnoh ba u lynthaw ïa ki ‘Mobile Phone’ bad ktah kti ïa kawei ka longkmie bad ki khun jong ka, u Rollingson u la kyntait ïa katei ka jingshah kynnoh. Ha kaba ïadei bad ka jingkynnoh ba u la sei ‘pistol’, u la pynshai ba um ju don ‘pistol’.
U Rollingson u la ong ba ka jingkynnoh pyrshah ïa u ka dei na ka daw ba kine ki kwah ban lait na ka jingsiew ïa ka bai dieng bad pyrshang ban thad bad pynthohbria ïa ka kyrteng jong u kum uta u nongthombor tang ban lait siew ïa ka bai dieng ba ki la dep pom.
