Shillong, K’lyngkot 21
Ka jingtei ïa ka jaka ban pynmih ïa ka lyer shet jingshet (LPG Bottling Plant) da ka Indian Oil Corporation Limited (IOCL) ka la ïaid mynta ha Ri Bhoi district bad kane ka jaka kan pynmih 30 hajar metric ton shisnem ynda la dep ban tei ïa ka.
Katkum ka jingbuh por, ïa kane ka bottling plant yn pyndep ha u bnai Jylliew 2025.
Ka jingmang pisa ïa kane ka projek la leh da ka IOCL kumba T.105 klur ha ka jaka kaba heh kumba 6.6 akar ha Ri Bhoi district.
Kane ka bottling plant ha Ri Bhoi kan pynbiang ïa ka jingdonkam lyer shet jingshet sha kumba 7.5 lak ngut ki nongpyndonkam LPG lyngba ki 31 tylli ki kompani sam LPG ha baroh kawei ka Jylla.
Kumba ka long mynta, kitei ki kompani kiba sam LPG ki hap ban pyndap ïa ka tyndong lyer shet jingshet na ka LPG Bottling Plant kaba don ha Sarpara ha North Guwahati, Bongaigaon bad Silchar.
Ynda la treikam ka LPG Bottling Plant ha Ri Bhoi, kumba T.8.13 klur shisnem yn lah ban pyllang ïa ka pisa kaba ju pynlut baroh shikatta na ka bynta 30 hajar MT ka tyndong lyer shet jingshet haba leit ban pyndap sha Assam.
La ong ba na kane ka Bottling Plant yn sa pyllait kumba 7 hajar tylli ki tyndong lyer shet jingshet man ka sngi ha kaba yn ym duna ïa ka 22 tylli ki trok kiba thep LPG cylinder bad kiba wan pynhap pat kin don kumba 5 ne 6 trok kaba long 18 MT ka sngi.
Ynda la dep ban tei bad pyntreikam ïa ka Bottling Plant yn sa lah ban kham janai ka jingsam LPG sha ki paidbah nongpyndonkam.
Ka jingangnud ban don ka LPG Bottling Plant ha Meghalaya ka dei kaba la slem bha hynrei ka lad kam plie khamtam namar ka jingeh ban ïoh jaka.
