Shillong, K’Lyngkot 21 (UNI)
U nongïalam ka seng Congress, u Rahul Gan-dhi, un wan poi ha Ri-Bhoi ha ka Lah Sngi U Blei kum shi bynta na ka jingïaid lynti jong u ïa kaba la ai kyrteng ‘Bharat Jodo Nyay Yatra’.
Ka jingwan jong u Rahul ka long hadien ba u la pyndep ïa ka jingïaid ha Manipur, Nagaland bad Assam.
Katei ka jingïaid jong u Rahul ka la sdang na Manipur ha ka 14 tarik Kyllalyngkot bad kan kut ha Mumbai ha ka 20 tarik Lber.
U nongïalam ka seng Congress, u Bah Ronnie V Lyngdoh, u la ong ba u Rahul un sa aiti ïa ka lama jong ka ‘Bharat Jodo Nyay Yatra’ sha ka seng Congress ha Meghalaya ha Jorabat.
Na Jorabat, u Rahul un leit sha ka shlem treikam jong u DTO ha Nongpoh, bad hadien kata, un sa ïalam ïa ka jingïaid kjat sha NSCA Mini Stadium ha Pahamsyiem, bad ha kane ka madan, un sa ai jingkren sha ki paidbah.
Na Pahamsyiem, u Rahul un leit phai sha Byrnihat ha kaba un sah miet. Ha ka Sngi Ba-Ar, u Rahul un ai jingkren ha ka jingïalang jong ka North East Congress Coordination Committee ka ban long ha University of Science and Technology, Meghalaya ha Byrnihat.
Na ka liang ki bor pahara ki la pynkhreh na ka bynta ka jingwan jong u Rahul. Ki nongïalam jong ka seng Congress ki khmih lynti ba bun ngut ki ‘riew paidbah kin ïa mih ha kane ka jingwan jong u Rahul sha Ri-Bhoi.
