Shillong, K’Lyngkot 21
U President ka Voice of the People Party (VPP), u Bah Ardent Miller Basaïawmoit, u la kren shai ba ka seng kan sa nang pynkhlaiñ ïa ka jingïakhih halor ka jingweng noh ka sorkar jylla ïa ki lai ngut ki ophisar kiba dei na ka tnat tohkit jong ka Meghalaya Lokayukta.
“Ha kaba ïadei bad kaei kaba jia ha ka 19 tarik ba na ka liang ki bor pynïaid district ki la pyni da ka bor ïa ki nongïalam jong ka VPP, bad kaei kaba nga don ban ong na ka liang jong nga kum u President bad ka seng ka long ba ngin ym shah jem da lei-lei ruh em ïa ka jingthombor namar ngi im ha ka ri synshar paidbah,” la ong u Bah Ardent ha u kyrwoh sha ki paidbah.
U la ong ba ka jingpyndonkam ka sorkar lyngba ki bor distrik ïa ka kyndon 144 CrPC ka dei ka jingpyndonkam bakla bad kaba yn sa ïakren kham bha.
“Kane hi kan sa pynlong ïa ngi ban pynkhlaiñ shuh shuh ïa ka jingïa-khih,” la ong u President ka VPP.
Nalorkata, u la ong ba ka VPP ka dei ka seng kaba ïeng na ka bynta u paidbah bad ka jylla halor ka nongrim ban wanrah ïa synshar ka khadar ka bakhuid kaba mut ka thma pyrshah ïa ka bamsap.
“Ngi la ïohi ba ki la sdang don ki jingpyrshang jong ki nongïalam kiba don ha ka sorkar naduh u Symbud Myntri Rangbah, Myntri bad ki briew jong ki kiba pyrshang ban sait hok. Hynrei kaba nga kwah ban ong hangne ka long ba kum ki nongïalam jong ka seng ngi long kiba kloi ban ïa tyrko nia bad u Symbud Myntri Rangbah lane ïano ïano ba ki kwah ban ïa pynbeit ban ïatia ïa ka Act ïa ki Rule jong ka Lokayukta bad kan paw shai kdar mano ba pyrshang ban buhrieh ïa ka jingshisha la kiei ngi, ngi ïeng kum ka seng ka long em kaba shong hok,” la ong u Bah Ardent.
U la kren shai ruh ba ka seng kan ym ailad da lei-lei ïa ka jingleh shiliang khmat bad tuh noh ïa ka hok jong ki nongshong shnong bad kan ïakhun bad pynkhlaiñ.
“Ka long kaba sngewthamula bad nga ngeit ba ki paidbah kiba don ïa ka bor pyrkhat, kiba sngewthuh haba ki bishar ki pynshong nongrim ki pynshong dor ïa ka jingpyrshang ban pynshai la ka long na ka liang u Symbud Myntri Rangbah ne Myntri kiba don ha kane ka sorkar MDA II kan pynpaw ïa ki jingthmu barieh bad jingthmu basniew ba ki don,” u la bynrap.
Nalorkata, u Bah Ardent u la ong ba u Symbud Myntri Rangbah u la pynpaw ba balei donkam ban thung da ki ‘Serving Officer’ lane kiba dang don ha ka kam namar lada thung da ki ophisar ba la shongthait kin ym sngap, kin ym tieng ïa ka sorkar bad kin leh ïa kaei kaba ki dei ban leh bad kaei kaba ki ‘Serving Officer’ kin leh kumba ka sorkar ka kwah namar u ‘Serving Officer’ un dang tieng ïa ka sorkar katba u ophisar ba la shongthait un ym tieng.
Hynrei u Bah Ardent u la ong ba ha ka jingshisha ka aiñ ka dei ban long beit kaba shai ba dei ban thung ïa ki ‘Inquiry Officer lane ki ‘Prosecuting Officer’ kiba dei kiba la shongthait namar kim don kano kano ka jingteh jingkhum ïa ki.
“Hynrei kane ka la nang paw shai ïa ka buit kaba rieh ka jong ki, bad ruh ka jingpynpaw ïa ka jingleh bakla. Kumno phin ong ba ka dei ka jingleh bakla! Phi la leh bakla bad phin weng ïa ki ruh pyrshah ïa ka kyndon aiñ nym lah ban pynksan da lei-lei ruh em. Namarkata ka daw, na ka liang ka seng ngin pynkhlaiñ ïa ka jingïakhih ka ban sdang biang la Lah Sngi U Blei,” u la ong.
Nalorkata, u la kyntu ïa ki paidbah ba kin mih shakhmat ban synran ïa ki nongïalam jong ka seng ban pyni ba u paidbah ha kane ka ri u kwah ban pynduh ïa ka bamsap.
Halor ka jingkren u Symbud Myntri Rangbah, u Bah Prestone Tynsong, ba kita ki lai ngut ki ophisar ba la shah weng kam ki dei ki bahaïing hasem jong ka VPP, u Bah Ardent u la ong, “Nga kwah ban ong da kaba shai ïa u Symbud Myntri Rangbah, wat lada ka dei ba uta u ophisar u dei u bahaïing ba hasem jong u Symbud Myntri Rangbah ruh ngin shim ïa ka lad ka lynti ban ïada ïa ka hok ka jong u.”
“Sa kawei ka mat kaba nga kwah ban ban ha kane ka por ka long halor ka jingpynshai kine ki Myntri kiba don hapoh ka MDA II ki pyni ba ka jingthung ïa kine ki ophisar ka long beaiñ, balei ki pyndonkam ïa ka kyntien beaiñ ha ka jingshisha kam dei beaiñ, kam don kano kano ka jingpynksan ha ka Act ban ong ba kadei kaba beaiñ. Hynrei ki buh khnang ïa kane ka kyntien beaiñ, ka daw baroh ka long ba lada ka jingthung ïa kine ki ophisar ka long kaba beaiñ, ka pyni ba kata ka ‘investigation process’ lane kata ka ‘procedure’ ba tohkit ka long kaba beaiñ; kan ïap noh kata ka jingtohkit ba ki la dep bad ki kam baroh kaba la leh da kine ki ophisar kan ïap noh namar ka jingthung jong ki ka long kaba beaiñ. Ngin nym ailad da lei-lei ruh em ban pynhap ha kata ka kyrdan ba ka jingthung ïa kine ki ophisar ka long kaba beaiñ. Ngin ïakhun ban pynrung biang ïa ki bad ailad ban pyndep katkum ka samoi treikam kaba ki dei,” la ong u Bah Ardent.
U la kyntu ïa ki paidbah ba kin ïeng ha kane ka thma khlem jingsheptieng ïa kita ki jingpyni bor jong ka sorkar da ka lynti kaba jai-jai bad jop ïa ka thma.
