Shillong, K’lyngkot 21
Ka jingkhapngiah ka sor Shillong bad jur ka jingdheng kali man ka sngi ka la pynlong ïa ka sorkar jylla ba kan dang pynkhreh ban rah noh ïa ka Secretariat sha New Shillong. Pynban na ka liang ka sorkar jylla haduh mynta kam pat shym la pynkhreh kumno ban pynheh lypa ïa ka surok naduh Ishyrwat kaba don saw tylli ki lad khnang ba ka surok ban leit sha New Shillong ban ïakynduh bad ka surok Shillong Bypass kan nym mad kumjuh ïa ka jingsahkut kali.
Ban twad jingmut na ki nongïalam shnong halor ka jingpynïar ka sorkar ïa ka New Shillong, ki nongïalam shnong Mawkasiang ki la ai jingmut ïa ka sorkar ba ka dei ban pynheh lypa ïa ka surok naduh Ishyrwat khnang ban nym dheng kali ynda la dep ïa ka ïingdorbar thawaiñ bad ïa ka Secretariat ha New Shillong.
Haba ïoh ban ïakren kyrpang bad u Bah Tishalding Kharkongor, Rangbah Shnong Mawkasiang u la pynpaw ka jingsngewkmen haba ka sorkar ka la wanrah ïa ka New Shillong hynrei kam shym la don ka jingpynkhreh lypa kumno ban pynheh ïa ka surok namar tang mynta ruh ka la khapngiah haba la ïaid bun ki kali kiba leit sha Shillong Bypass.
Nalor nangta, u la ïathuh ba ha ka shnong Mawkasiang ki don palat lai hajar ngut ki nongshong shnong, hynrei ka um mynta ki paidbah ki hap shu thied bad ka bording ruh kam pat biang. Namar kata, u la ai jingmut ïa ka sorkar ba ka dei ban pynbiang ruh ïa ka um haba ka wanrah ïa ka New Shillong.
U la ïathuh ba ka shnong Mawkasiang ka sdang naduh NEIGRIHMS shaduh St. Francis School.
Ban batai kham bniah shuh shuh ïa kane ka New Shillong, u Secretary Shnong Bah W Chyne, u la ïathuh ba ki ophis jong ka Sorkar India kiba la don ha Mawkasiang ki long ka NEIGRIHMS, NEIAH, CBI, IHM, Maharashtra University bad ki ophis ka sorkar jylla ki long ka tnat Arts and Culture, ka MATI, Home Guard, Ïingdorbar Thawaiñ bad kiwei.
U Bah Chyne u la ai jingmut ïa ka sorkar lada ka kwah ban pyllait dheng kali ïa ka New Shillong ka la dei ban pynheh ïa ka surok da kaba shna Four lane na Ishyrwat bad Flyover namar ha kane ki don saw lad, kata ban leit sha Mawpat, New Shillong, Umpling bad Nongmensong.
Nangta u la ong ba ynda la dep ïa ka ïingdorbar thawaiñ ka jingdheng kali kaba jur hangne namar kin ïaid ki kali ophisar, ki Myntri Sorkar bad ïakynduh bad ki kali kit nongpang ban leit phah sumar sha NEIGRIHMS.
Shuh shuh u la ai jingmut ba ka sorkar ka la dei ban shna ruh sa ïa ka ïew namar baroh ki briew na New Shillong kin nym leit tur ban leit thied jingthied sha Ïewduh bad Khyndailad khnang ban lait ka dheng kali.
Khatduh eh u Bah Chyne u la ai jingmut ba ka sorkar ka dei ban wanrah ruh sa ïa ki skul bad kolej khnang kiba sah ha New Shillong kin nym tur shuh sha Shillong barim ynda ki la pyndep ïa ka klas X.
