Nongstoiñ, K’Lyngkot 21
Uwei u briew ïa uba la tip kyrteng kum u Bah Nijilson Lyngkhoi na ka shnong Marshillong, South West Khasi Hills, u la khlad noh hadien ba la suba jur ba u la shah pynïap dusmon ha ki briew ki bym pat lah ban tip ha Pyndengshahlang, West Khasi Hills.
U Superintendent of Police ka West Khasi Hills, u Bikram D Marak, ha u kyrwoh khubor u la ong ba ki pulit ki la ïoh jingpyntip na ki bahaïing jong utei u briew uba la khlad ha ka janmiet jong ka Sngi U Blei bad mar-mar ki la hiar sha katei ka jaka ban pynlong ïa ka jingtohkit.
U SP u la ong ba ki pulit ki la lap ïa ka metïap jong u Bah Nijilson kaba la thiah lyngktar harud surok ha Pyndengshahlang ha ryngkat ki dak mynsaw na ka shadem bad la rah noh ïa ka metïap sha Civil Hospital Nongstoiñ ban leh ïa ka ‘post mortem’.
Shuh shuh u la ong ruh ba haduh mynta ki pulit ki dang bteng ban pynlong ïa ka jingtohkit kaba bniah halor ka jingïap jong utei u briew.
