Shillong K’lyngkot 22
Ka Myntri Sorkar kaba dei ruh ka MLA ka East Shillong konstitwensi ka Kong Ampareen Lyngdoh ka pynbna ba kumba 89 ngut kiba shong die jingdie harud surok ha thaiñ Laitumkhrah yn sa pynkynriah noh shawei pat katkum ka kyndon aiñ.
Ka ong ba ïa kane la dep ban ïakren lang bad ki bor ba dei khmih ryngkat ka Dorbar Pyllun Laitumkhrah nalor ki pulit pynïaid kali namarba kan sa don ka jingpynbeit ïa ka rukom ïaid ki kali khnang ban nym mih jingeh ha ki jaka ban pynkynriah ïa kiba shong die jingdie madan.
Haba kylli, ka Myntri ka la ong ba katkum ka jingithuh ïa kiba la shong die jingdie harud surok ha thaiñ Laitumkhrah, ki don kumba 89 ngut bad ïa kine la shim tang kito kiba la dep don lypa ban die jingdie kumba 6 bnai, hynrei ïa kiba wan die hadien jong kata, ym don shuh da kumwei pat, bad kito kiba ïaid lait kin ngat katkum ka aiñ kaba don.
