Shillong, K’Lyngkot 22
Ka Bharatiya Janata Party (BJP) Meghalaya haba pynpaw ïa ka jinglyngngoh bad ka jingbym sngewïahap jong ka jingshah kyntait jong ka ktien Jaiñtia ha ka jingrwai State Anthem, ka la buh jingkylli na ka Sorkar Jylla ba kaei kaba la pynlong ban nym pynrung ïa ka ktien Jaiñtia.
Ka BJP Meghalaya ka la lyngngoh ba balei ka ktien Jaiñtia ka shah kyntait na ka jingrwai ba la shna thymmai kum ka dak ban pynmih ïa ka ban rakhe ïa ka jingdap 52 snem ka Jylla Meghalaya. Kito kiba lah ïohsngew bad sngap ïa ki kyntien ki tip shai bha ba ka ktien Jaiñtia kam don ha kane ka State Anthem ba thymmai hynrei tang ka ktien Khasi, Garo bad Phareng.
Ha ka kyrwoh khubor ba la pyllait da ka BJP Meghalaya, ka la pyntip ruh ba ka jingïalang jong ka Kynhun Myntri (Cabinet) ba la buh shuwa ban pyllait ne ai rai ïa ki kyntien ba la shna ïa kane ka sur ka State Anthem, u Myntri bad u dkhot ka BJP u Bah A.L Hek u la ïeng nongrim bad skhem ïa ka jingong jong u ba ka jingrwai State Anthem kam lah ban pynmih paidbah khlem da kynthup lang ïa ka ktien Jaiñtia. Ha ka jingïalang jong ka Kynhun Myntri, u Bah Hek u la ong ruh ba ki nongshna ïa ki kyntien jong kane ka sur bad nongpynmih ïa kane ka jingrwai ba kan dei ban thoh bad pynmih biang da kawei kaba kynthup lang ïa ka ktien Jaiñtia. Ki jingkren jong u, ka la shu long lehnohei bad ka jingong bad ai jingmut ka la shu sah khlem don ka jingpynsngew ne shimti ïa ka jingong jong u Bah A.L Hek.
Halor kane, u Nongaiktien ka BJP Meghalaya u Bah Mariahom Kharkrang u la ong, “Ka long shisha kaba sngewsih ba ka ktien kaba ïar ha ka ri jong ngi kan shu shah kyntait kumne, hynrei ngim tip ïa ka daw ba ki khlem kynthup ïa ka ktien Jaiñtia dei ba ki shu bakla ne dei ka rukom shna ïa ki sur.” U Bah Kharkrang u la ong, “Tangba kaei ba ngi tip ka long ba ka ktien Jaiñtia ka dei ban don jingïasnoh lang ha kane ka State Anthem ka Meghalaya bad ngi pan ïa ka jingpynbeit ha kane ka nongrim na ka sorkar bad ngi dei ban ïa tylli lang khlem da pynsngewsih ne pynsngewpher shiliang. Ki jaidbynriew Khasi, Garo, Jaiñtia ki dei ki ‘riew ba pynskhem ïa ngi kum ka ri. Ngi dei ban ïa tylli kum kawei bad ban pynbha ïa ka jingroi jingkiew kum ki paid ka ri Meghalaya.”
