Shillong, K’lyngkot:
Hadien shi snem ba u la pynmih ïa ka phlim “Khat Saw Phra 14/8” uwei napdeng ki nongshna phlim ba tbit na ka jylla, u Bah Kenny Lyngdoh, u la pynkhreh ban wanlam biang sha ki paidbah ïa ka phlim ka ban pynïapbiej ïa ki bad ka ban pynsah ïa ki paid nongpeit ha ka jinglyngngoh (suspense thriller).
Kum ban shu pynkynmaw u Bah Kenny u la don bynta ban pynmih ïa ka phlim Gangs of North East (2017) bad ban shna ïa ka phlim AHOR (2022).
Ha ka phlim ‘Unveiling Shadows (RNGAI)’, la ak da kawei napdeng ki puron ba pawnam ka Regina Lamo.
Kane ka phlim ka ïathuh khana shaphang ka jingban khia ka jingsngewsih jong ka puron hadien ka jingshah pynïap ka kmie bad kiba dei shipara bad ka. Ha kum kane ka jingshem lanot jong ka, ka don ka jingthmu ban wad ïa ka tynrai bad ka daw jong ka jingshah pynïap ki baieid bathoiñ jong ka. Ha ka jingïaid lynti jong ka ban wad ïa ka jingshisha, ka shem ïa kiei kiei kiba pynher syrngiew ïa ka.
U Bah Kenny Lyngdoh u la ong, “Kane ka phlim ka pyni ba, ïa kiei kiei baroh kam long kumba ngi mut ne ïohi nabar. Kane ka phlim ka ïathuh khana ïa ka jingïaid lynti jong ka puron bad jingshem jong ka ïa bun ki jingpynthame, ki jingartatien.”
Ka puron Regina Lamo kan ïatreilang bad u nongshna phlim Bah Kenny Lyngdoh. Ha kane ka phlim ngin ïohi ruh ïa kiwei kiwei ki tyngshop ki puron kiba paw kum u Jeremy Khongjee, Banatimon Mawlong, Mangkara Khongthohrem, Brandon Sunn, Phidalin Kharsyntiew, MewanpynbhalangTham bad kiwei kiwei ruh.
Ka ‘teaser’ jong kane ka phlim la dep pyllait ha YouTube channel bad ïa ka phlim yn pyllait ha u bnai Rymphang.
