Jowai, K’Lyngkot 22
Ka Synjuk Waheh Shnong Ri Jaiñtia (SWSRJ) ka la dawa na ka Sorkar Jylla ba kan pynbeit thymmai ïa ka jingrwai ‘Meghalaya Anthem’ da kaba pynrung lang ïa ka kyntien Jaiñtia ne Pnar kumba la pynrung ïa ka kyntien Khasi bad Garo.
Ïa kane ka jingdawa la pynsngew da u President u Bah Army Lipon ha ka jingdonlang ki dkhot bad nongïalam ka SWSRJ haba kren bad ki lad pathai khubor ha ka Lah Sngi U Blei.
U Bah Lipon u la ong, ka Synjuk ki Waheh Shnong Ri Jaiñtia ka dap da ka jingsngewdiaw hadien ka jingbym kynthup lang ka sorkar ïa ka kyntien Jaiñtia ha ka ‘Meghalaya Anthem bad kane ka jingleh klet jong ka sorkar lehse kan wanrah ïa ka jingsngew bad ktah ïa ki nong Jaiñtia.
U la pynkynmaw ba ka Meghalaya ka ïoh ïa la ka Jylla lajong ha u snem 1972 bad ka la don ka jingthoh ba ka Meghalaya ka don ïa ki lai tylli ki jaidbynriew riewlum kata Khasi, Garo bad Jaiñtia.
“Haba ïa ka kyntien Khasi bad Garo la kynthup hapoh ka Meghalaya Anthem ngi kwah ïa ka sorkar ba kan pynrung sa ïa ka kyntien Jaiñtia khnang ban im ka jaidbynriew,” la ong u Bah Lipon.
Ha kawei pat ka liang u la pynpaw ïa ka jingkmen ban ïohi ba ha ka Meghalaya Anthem la pynmih tang ïa ki dur ha ka por ba pyndep ïa ka leh niam leh rukom da ki khun ka Raij Jowai ha ka por ba ki hiar hapoh ka Aitnar. Hynrei ka kyntien Jaiñtia kaba la khmih lynti ba kan mih ka khlem mih hynrei la mih pynban da ka kyntien phareng.
Khnang ba kan long salonsar bad ba ka Jaiñtia kan ïoh bynta lang hapoh ka imlang sahlang bad ruh hapoh ka jylla Meghalaya, ka synjuk ka kyntu ïa hynñiew ngut ki MLA na Rilum Jaiñtia bad ruh ïa u Myntri ka tnat Art & Culture ka Sorkar Jylla ba kin pynbeit thymmai da kaba ai-bhah ai-bynta lang ïa ki nong Jaiñtia namar lada ka long kumne ka long kumba pynïap syndon ïa ka kyntien Jaiñtia, u la ong shuh shuh.
“Ngi pdiang ïa kino-kino ki kyntien hynrei ka kyntien Jaiñtia dei ban tip ka pyrthei namar ka long kyrpang, la ka long ha ka niam ka rukom bad ka kolshor. Kumta ngi kwah ba ka sorkar kan pyrkhat bha bad kan ai ka bhah kyrpang lym kumta ka synjuk kan pyrkhat da kawei ka lynti bad khnang ban lait na kino-kino ki kam kiba long pyrshah ïa ka sorkar bad ïa kino-kino ki jingjia kiba sngewsih kiba ktah ïa ka ri bad ka jaidbynriew, ka synjuk ka la kyrpad katba lah ban pynbeit thymmai namar ka por ka dang biang ïa ka sorkar ba kan pynbeit ïa ka jingduna jingbakla,” la ong u Bah Lipon.
